కొత్త కోచ్‌కు ద్రవిడ్ వాయిస్ మెసేజ్.. విని భావోద్వేగానికి గురైన గంభీర్
శ్రీలంక పర్యటనతో భారత క్రికెట్ చరిత్రలో నూతన అధ్యాయం మొదలుకాబోతోంది. టీ20 ప్రపంచకప్ 2024 టైటిల్ సాధించిన తర్వాత హెడ్ కోచ్ బాధ్యతల నుంచి రాహుల్ ద్రవిడ్ తప్పుకున్న విషయం తెలిసిందే. ఇప్పుడు ఆ బాధ్యతలు నిర్వర్తించే కొత్త కోచ్ వచ్చేశాడు. ఐపీఎల్ 2024లో కోల్‌కతా నైట్ రైడర్స్‌ను ఛాంపియన్‌గా నిలిపిన గౌతమ్ గంభీర్.. రాహుల్ ద్రవిడ్ స్థానాన్ని భర్తీ చేసేందుకు సిద్ధమయ్యాడు. ఇవాళ్టి నుంచి ప్రారంభం కానున్న శ్రీలంకతో టీ20 సిరీస్‌లో భారత క్రికెట్‌లో గంభీర్ నూతన అధ్యాయం ప్రారంభం కానుంది. ఈ నేపథ్యంలో టీమిండియా మాజీ హెడ్ కోచ్ రాహుల్ ద్రవిడ్ నుంచి నయా కోచ్ గౌతమ్ గంభీర్‌కు సర్‌ప్రైజ్ వచ్చింది.
నూతన హెడ్ కోచ్ గంభీర్‌ను ఉద్దేశించి రాహుల్ ద్రవిడ్ వాయిస్ మెసేజ్ పంపించాడు. ఇది విన్న గంభీర్.. భావోద్వేగానికి గురయ్యాడు. ఇందుకు సంబంధించిన వీడియోను బీసీసీఐ సోషల్ మీడియా ద్వారా అభిమానులతో పంచుకుంది. ఆ వీడియోలో ఏముందంటే..
‘హెలో గౌతమ్ గంభీర్.. ప్రపంచంలోనే ఉత్సాంహవంతమైన జాబ్‌లలో ఒకటిగా ఉన్న టీమిండియా క్రికెట్ కోచ్ పోస్టులోకి నీకు ఆహ్వానం పలుకుతున్నా. టీమిండియా క్రికెట్‌లో నా ప్రస్థానం ముగిసి ఇప్పటికే మూడు వారాలు అవుతోంది. నేను ఊహించినదాని కంటే కూడా గొప్పగా నా పదవీ కాలాన్ని ముగించా (టీ20 ప్రపంచకప్ 2024 టైటిల్ సాధించడం). ఆ తర్వాత ముంబైలో మాకు లభించిన స్వాగతం ఎప్పటికీ మర్చిపోలేను. జట్టుతో నేను గడిపిన సమయం, ఆటగాళ్లతో బంధాలు, జ్ఞాపకాలను ఎప్పటికీ పదిలంగా ఉంచుకుంటా’ అని ద్రవిడ్ చెప్పుకొచ్చాడు.
కష్టమైన సరే.. కాస్త చిరునవ్వుతో కన్పించు
‘ఇప్పుడు నా స్థానంలో కోచ్‌గా నువ్వు వచ్చావు. నా లాగే నువ్వు కూడా ఎన్నో మధుర జ్ఞాపకాలను సంపాదించాలని కోరుకుంటున్నా. నీకు అద్భుతమైన ఆటగాళ్ల బృందం ఉంది. దీంతో పాటు అదృష్టం కూడా నీ వైపే ఉండాలని మనస్ఫూర్తిగా కోరుకుంటున్నా. తోటి ఆటగాడిగా నీ గురించి నాకు తెలుసు. ఐపీఎల్ సీజన్లలో నువ్వు కోచ్‌గా పనిచేసినప్పుడు.. జట్టు గెలవాలనే కసిని, యువ ఆటగాళ్లతో నువ్వు కలిసి పనిచేసిన తీరును గమనించా. ఆటగాళ్ల ప్రదర్శనను బయటకు తీసే సామర్థ్యం నీ సొంతం’ అని ద్రవిడ్ అన్నాడు.‘భారత జట్టుగా మనపై భారీ అంచనాలు ఉంటాయని నీకు తెలుసు. ప్రతికూల పరిస్థితుల్లో కూడా నువ్వు ఒంటరివాడివి కాదనే విషయం గుర్తుంచుకో. నీకు ఆటగాళ్లు, మేనేజ్‌మెంట్ సపోర్ట్ ఉంటుంది’ అంటూ గంభీర్‌కు భరోసా ఇచ్చాడు ద్రవిడ్. ‘నీకు కష్టమైన సరే.. అప్పుడప్పుడూ కాస్త చిరునవ్వుతో కన్పించు (నవ్వుతూ) గంభీర్’ అంటూ రాహుల్ ద్రవిడ్ తన సందేశాన్ని ముగించాడు.
ఇది విన్న గంభీర్.. భావోద్వేగానికి గురయ్యాడు. ద్రవిడ్ మెసేజ్‌కు స్పందించేందుకు మాటలు రావడం లేదని చెప్పుకొచ్చాడు. తనపై ఉంచిన బాధ్యతను నూటికి నూరు శాతం నెరవేర్చుతానని.. అందరూ గర్వపడేలా బాధ్యతలు నిర్వహిస్తానని గంభీర్ చెప్పాడు.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి. 2024-07-27T10:12:53Z dg43tfdfdgfd