సిక్సర్ల క్లాసేన్‌కు గురువులు.. మన అభిషేక్ శర్మ, నితీశ్ రెడ్డి..!
ఐపీఎల్ 2024లో ఇప్పటి వరకూ అత్యధిక సిక్సులు బాదిన ఆటగాళ్లలో సన్‌రైజర్స్ స్టార్ ప్లేయర్ హెన్రిచ్ క్లాసేన్ ఫస్ట్ ప్లేస్‌లో ఉన్నాడు. ఇప్పటి దాకా ఆరు మ్యాచ్‌లు ఆడిన క్లాసేన్ 24 సిక్సులు, 9 ఫోర్లు కొట్టాడు. ఫోర్లు కొట్టడం కంటే.. సిక్సర్లు బాదేందుకే ఈ సఫారీ బ్యాటర్ ప్రాధాన్యం ఇస్తున్నాడు. ఈ సీజన్లో అతడు 199.21 స్ట్రైక్ రేట్‌తో పరుగులు చేస్తుండటం గమనార్హం.
మంచి నీళ్లు తాగినంత తేలిగ్గా క్లాసేన్ సిక్సులు కొట్టగలడు. ఒక్కసారిగా గేర్ మార్చి.. క్షణాల్లో పరిస్థితులను మార్చేయడంలో అతడు సిద్ధహస్తుడు. ఈ సీజన్లో సన్‌రైజర్స్ రెండుసార్లు ఐపీఎల్‌లో అత్యధిక స్కోరు నమోదు నమోదు చేయడంలో అతడిది కీలక పాత్ర. అలవోకగా సిక్సులు కొట్టే క్లాసేన్.. బెంగళూరుతో జరిగిన మ్యాచ్‌లో ఫెర్గ్యుసన్ బౌలింగ్‌లో 106 మీటర్ల సిక్స్‌ బాదాడు. దీంతో బంతి స్టేడియం వెలుపల పడింది.
నెట్స్‌లో సిక్సులు బాదడాన్ని ప్రాక్టీస్ చేసే క్లాసేన్.. మ్యాచ్‌లో అలాంటి షాట్లనే రిపీట్ చేస్తుంటాడు. అతడు ఐపీఎల్‌లో ఈ రేంజ్‌లో షాట్లు ఆడేందుకు భారత అన్‌క్యాప్డ్ కుర్రాళ్లు కూడా సాయం చేస్తున్నారట. సన్‌రైజర్స్ జట్టులోని అభిషేక్ శర్మ, నితీశ్ కుమార్ రెడ్డి సైతం సిక్సర్లతో విరుచుకుపడతారనే సంగతి తెలిసిందే. అభిషేక్, నితీశ్ చక్కగా హిట్టింగ్ చేస్తున్నారన్న క్లాసేన్.. నెట్స్‌లో వారు ఎలా బ్యాటింగ్ చేస్తున్నారో చూస్తానన్నాడు. వారిద్దరి నుంచి షాట్లు ఆడటం నేర్చుకుంటున్నానని చెప్పాడు. అంతేకాదు నేర్చుకోవడానికి చిన్నా, పెద్ద అనే తేడా ఉండదన్న క్లాసేన్.. వారి ఆటను చూడటం ద్వారా కొత్త షాట్లను ఖాతాలో వేసుకోవచ్చన్నాడు. ఎంత చిన్న వారి దగ్గర్నుంచైనా కొత్త విషయాలు నేర్చుకోవచ్చన్నాడు.
వాస్తవానికి క్లాసేన్ సీనియర్ ఆటగాడు. సౌతాఫ్రికా తరఫున ఆడటంతోపాటు సత్తా చాటిన ప్లేయర్ అతడు. ప్రస్తుతం టీ20ల్లో ది బెస్ట్ వికెట్ కీపర్ బ్యాటర్‌గా కొనసాగుతున్నాడు. అలాంటి ప్లేయర్ తన కంటే ఎంతో చిన్నవాళ్లయిన.. ఇంకా జాతీయ జట్టు తరఫన అరంగేట్రం కూడా చేయని ఆటగాళ్ల నుంచి నేర్చుకుంటున్నానని చెప్పడం.. అతడి హుందాతనానికి నిదర్శనమని నెటిజన్లు కామెంట్లు చేస్తున్నారు.
స్పిన్ బౌలింగ్‌ను ఎదుర్కోవడం కోసం తాను చాలా హోం వర్క్ చేస్తానని క్లాసేన్ తెలిపాడు. టీమిండియా స్పిన్నర్ యుజ్వేంద్ర చాహల్ బౌలింగ్‌ను ఎదుర్కోవడాన్ని తాను ఇష్టపడతానన్నాడు. తను చిన్నతనంలో క్రిస్ గేల్ ఆటను ఇష్టపడేవాడినన్న క్లాసేన్ అందుకే.. 45 నంబర్ జెర్సీని ఎంపిక చేసుకున్నానని చెప్పాడు. మాథ్యూ హెడెన్, బ్రెండన్ మెక్‌కల్లమ్ ఆటను చూసి కూడా చాలా నేర్చుకున్నానన్నాడు.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి. 2024-04-19T06:48:06Z dg43tfdfdgfd