వరల్డ్ కప్ జట్టుకు కెప్టెన్ అనుకుంటే.. జట్టులో చోటే గల్లంతు.. దేశం మారినా రాత మారలేదు..!
క్రికెటర్ ఉన్ముక్త్ చంద్ గుర్తున్నాడా..? 2012లో ఇతడి సారథ్యంలోనే భారత అండర్-19 జట్టు వరల్డ్ కప్ గెలుపొందింది. దీంతో కోహ్లి, యువరాజ్, కైఫ్ తదితర క్రికెటర్లలాగే ఉన్ముక్త్ చంద్ కూడా భారత జట్టులో కీలక ఆటగాడిగా ఎదుగుతాడని భావించారంతా. కానీ ఉన్ముక్త్ చంద్‌కు భారత జట్టులోకి అడుగుపెట్టే అవకాశం దక్కలేదు. 2011లోనే ఐపీఎల్‌లో అడుగుపెట్టి.. 2016 దాకా లీగ్లో ఆడినప్పటికీ.. కేవలం 21 మ్యాచ్‌ల్లోనే ఆడే ఛాన్స్ దక్కింది. వచ్చిన అరకొర అవకాశాలనూ అతడు సద్వినియోగం చేసుకోలేకపోయాడు.
భారత జట్టులో చోటు దక్కకపోవడం.. ఐపీఎల్‌లోనూ అవకాశాలు రాకపోవడంతో ఉన్ముక్త్ చంద్ కొన్నేళ్లపాటు దేశవాళీ క్రికెట్ ఆడాడు. అయినా ఏదో మూలన అసంతృప్తి. దీంతో అవకాశాలు వెతుక్కుంటూ.. అంతర్జాతీయ స్థాయిలో క్రికెట్ ఆడాలనే కలను సాకారం చేసుకోవడం కోసం అమెరికా చేరాడు. అమెరికా వెళ్లాక కసితో ఆడిన ఉన్ముక్త్.. మైనర్ క్రికెట్ లీగ్లో సెకండ్ హయ్యెస్ట్ స్కోరర్‌గా నిలిచాడు. అమెరికా జట్టు తొలిసారి ఈ ఏడాది టీ20 వరల్డ్ కప్‌లో ఆడనుంది. ఈ ప్రపంచ కప్‌లో అమెరికా జట్టుకు ఉన్ముక్త్ చంద్ కెప్టెన్‌గా వ్యవహరిస్తాడని చాలా మంది భావించారు. కానీ అమెరికా గడ్డ మీద కూడా ఉన్ముక్త్ చంద్‌కు షాక్ తగిలింది.
తాజాగా కెనడాతో టీ20 సిరీస్ కోసం అమెరికా ప్రకటించిన జట్టులో ఉన్ముక్త్‌కు స్థానం దక్కలేదు. న్యూజిలాండ్ ఆల్‌రౌండర్ కోరె అండర్సన్‌తోపాటు మోనక్ పటేల్, గజానంద్ సింగ్, జెస్సీ సింగ్, స్టీవెన్ టేలర్, నిసర్గ్ పటేల్, నోష్‌టుష్ కెన్జిగ్, సౌరభ్ నేత్రవాల్కర్, ఉస్మాన్ రఫీక్ తదితర ఆటగాళ్లను కెనడాతో టీ20 సిరీస్‌కు ఎంపిక చేశారు. టీ20 వరల్డ్ కప్ ముందు జరగనున్న ఈ సిరీస్‌లో ఉన్ముక్త్‌కు చోటు దక్కితే.. పొట్టి ప్రపంచకప్‌లోనూ ఆడే అవకాశాలు మెరుగ్గా ఉండేవి. కానీ వరల్డ్ కప్ ఆడాలనే అతడి కోరిక నెరవేరే అవకాశాలు మిణుకు మిణుకుమంటున్నాయి.
దీంతో తన దురదృష్టాన్ని తలచుకొని ఉన్ముక్త్ చంద్ తీవ్రంగా మనోవేదనకు గురయ్యాడు. తన బాధను, తనకు జరిగిన అన్యాయాన్ని గురించి ట్విట్టర్‌లో పోస్ట్ చేశాడు. చాలా మంది వ్యవస్థలు బాగుపడాలని కోరుకుంటారు. కానీ అధికారంలోకి వచ్చాక వాళ్లు కూడా అదే అన్యాయమైన మార్గాల్లో నడుస్తారు. మార్పు తెచ్చుకోవడానికి.. బలంగా నిలబడటానికి ఇదే సరైన తరుణం’ అని ఉన్ముక్ చంద్ ట్వీట్ చేశాడు. కెనడాతో టీ20 సిరీస్ తర్వాత.. టీ20 వరల్డ్ కప్ ముందు అమెరికా ఆడే మిగతా టీ20 సిరీస్‌లకైనా ఉన్ముక్త్ చంద్‌‌ను సెలక్టర్లు ఎంపిక చేస్తారేమో చూడాలి. ఒకవేళ అది సాధ్యం కాకపోతే.. దేశాన్ని వీడినా ఫలితం దక్కనట్టే.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి. 2024-03-29T13:23:56Z dg43tfdfdgfd