మళ్లీ ముంబై ఇండియన్స్ కెప్టెన్‌గా రోహిత్ శర్మ..? హార్దిక్ పాండ్య తీరుపై అంబానీ గుస్సా..!!

ముంబై ఇండియన్స్ కెప్టెన్‌గా రోహిత్ శర్మకే మళ్లీ పగ్గాలు అప్పగిస్తారా..? ఇదేంటి హార్దిక్‌ సారథ్యంలో ముంబై ఇండియన్స్ ఆడింది రెండు మ్యాచ్‌లే కదా. అప్పుడే కెప్టెన్సీ నుంచి అతణ్ని ఎలా తప్పిస్తారు.. ఏరికోరి గుజరాత్ నుంచి ట్రేడింగ్ ద్వారా కొనుగోలు చేశారు కదా అని అనుకుంటున్నారా..? మీ అనుమానం నిజమే. అయితే సన్‌రైజర్స్‌తో మ్యాచ్‌లో ముంబై ఇండియన్స్ ఓటమి తర్వాత రోహిత్ శర్మను తిరిగి కెప్టెన్ చేస్తారనే ప్రచారం మొదలైంది.

ముంబై ఇండియన్స్ వరుసగా రెండో మ్యాచ్‌లో ఓడిన తర్వాత ఆ ఫ్రాంచైజీ ఓనర్ ఆకాశ్ అంబానీ.. రోహిత్ శర్మతో సీరియస్‌గా ఏదో చర్చించారు. వారిద్దరూ మాట్లాడుకోవడంతో.. జట్టు నాయకత్వ మార్పిడి కోసమేనంటూ కొందరు ప్రచారం మొదలుపెట్టారు. హార్దిక్ పాండ్యవైపు అంబానీ సీరియస్‌గా చూస్తున్న ఫొటోను షేర్ చేసిన కొందరు నెటిజన్లు.. సన్‌రైజర్స్‌తో మ్యాచ్‌లో హార్దిక్ కెప్టెన్సీ చేసిన విధానం ఆయనకు నచ్చలేదని.. దీంతో మరోసారి అంబానీ రోహిత్ వైపు చూస్తున్నారనే ప్రచారం చేస్తున్నారు.

ఈ ప్రచారం సంగతి పక్కన బెడితే.. హైదరాబాద్ మ్యాచ్‌లో సన్‌రైజర్స్ బ్యాటర్లు ఊచకోత కోస్తుండటంతో హార్దిక్ పాండ్యకు ఏం చేయాలో పాలుపోలేదు. దీంతో రంగంలోకి దిగిన రోహిత్ శర్మ.. ఆటగాళ్లకు సూచనలిస్తూ.. ఫీల్డింగ్ సెట్ చేశాడు. నువ్వు బౌండరీ లైన్ దగ్గర ఫీల్డింగ్ చేయ్ అంటూ.. తొలి మ్యాచ్‌‌లో రోహిత్ శర్మను హార్దిక్ ఆదేశించగా.. రెండో మ్యాచ్‌కే సీన్ రివర్స్ కావడం గమనార్హం.

వాస్తవానికి రోహిత్ శర్మ నాయకత్వంలో ఐపీఎల్‌లో అత్యంత పటిష్టమైన జట్లలో ఒకటిగా ముంబై ఇండియన్స్ మారింది. రోహిత్ సారథ్యంలోనే ముంబై ఐదు ఐపీఎల్ టైటిళ్లు సాధించింది. అయితే 2024 సీజన్‌కు ముందు అనూహ్యంగా హార్దిక్ పాండ్యను గుజరాత్ నుంచి ట్రేడ్ చేసిన ముంబై.. రోహిత్ శర్మ స్థానంలో అతణ్ని కెప్టెన్‌గా నియమించింది.

ఈ విషయాన్ని రోహిత్ అభిమానులు, ముంబై ఇండియన్స్ ఫ్యాన్స్ ఇప్పటికీ జీర్ణించుకోలేకపోతున్నారు. అందుకే హార్దిక్ పాండ్యను తెగ ట్రోల్ చేస్తున్నారు. రెండో మ్యాచ్‌లో సన్‌రైజర్స్ ఐపీఎల్‌లోనే రికార్డ్ స్కోర్ చేయడంతో.. వారికి మరింత ఛాన్స్ దొరికినట్లయ్యింది. అయితే రెండు మ్యాచ్‌లకే హార్దిక్ పాండ్యను కెప్టెన్సీ నుంచి తప్పిస్తారని అనుకోలేం. కానీ రోహిత్ శర్మ ఇన్వాల్వ్‌మెంట్‌ను పెంచే అవకాశమైతే ఉంది. ఇప్పటికే హార్దిక్ మాట్లాడుతూ.. రోహిత్ శర్మ సూచనలు, సలహాలు తీసుకుంటానని చెప్పాడు. ఈ నేపథ్యంలో హార్దిక్‌నే కెప్టెన్‌గా కొనసాగించే అవకాశం ఉంది. ఒకవేళ వెంటనే కెప్టెన్‌ను మారిస్తే మాత్రం అది సంచలనమే అవుతుంది.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-03-28T07:51:04Z dg43tfdfdgfd