మమ్మల్నెవరూ గుర్తుపట్టలేదు.. అక్కడ భలే అనిపించింది: విరాట్ కోహ్లీ

టీమిండియా స్టార్ బ్యాటర్ విరాట్ కోహ్లీ ఇటీవలే రెండో సారి తండ్రి అయిన విషయం తెలిసిందే. కోహ్లీ-అనుష్క శర్మల దంపతులకు ఇటీవల అబ్బాయి జన్మించాడు. అతడి పేరు అకాయ్ అని.. ఈ సెలబ్రెటీ జంట సోషల్ మీడియా ద్వారా ప్రపంచానికి తెలిపింది. రెండో కాన్పు సందర్భంగా తన భార్య అనుష్క శర్మతో సమయం గడిపేందుకు విరాట్ సుమారు రెండు నెలల పాటు క్రికెట్‌కు దూరమయ్యాడు.

దక్షిణాఫ్రికా పర్యటన ముగిసిన తర్వాత జరిగిన ఇంగ్లాండ్‌తో ఐదు టెస్టు మ్యాచుల సిరీస్ నుంచి తప్పుకున్నాడు. తొలుత తొలి రెండు టెస్టులకు మాత్రమే కోహ్లీ దూరంగా ఉంటాడని భావించినా.. ఆ తర్వాత పూర్తి సిరీస్‌కు దూరమైనట్లు వెల్లడించాడు. ఇండియన్ ప్రీమియర్ లీగ్ 2024 కోసం విరాట్.. ఈనెలలోనే స్వదేశానికి వచ్చాడు. కోహ్లీ దంపతులు ఈ రెండు నెలలు ఏ దేశంలో ఉన్నారనేదానిపై అధికారిక ప్రకటన లేదు. కానీ విరాట్ ఫ్యామిలీ లండన్‌లో ఉన్నట్లు మీడియా కథనాలు పేర్కొన్నాయి.

ఇక సోమవారం పంజాబ్ కింగ్స్‌తో జరిగిన మ్యాచులో విరాట్ కోహ్లీ అదిరే ప్రదర్శన ఇచ్చాడు. హాఫ్ సెంచరీతో జట్టును గెలిపించాడు. ప్లేయర్ ఆఫ్ ది మ్యాచుగా నిలిచాడు. ఈ నేపథ్యంలో మ్యాచ్ అనంతరం మాట్లాడిన రన్ మెషీన్.. గత రెండు నెలల్లో తన అనుభవాలను గురించి తొలిసారి వెల్లడించాడు.

"మేము భారత్‌లో లేము (అనుష్క శర్మ రెండో బిడ్డకు జన్మనిచ్చి సమయంలో). మా చుట్టూ ఉండే ప్రజలు మమ్మల్ని గుర్తించని చోట మేము ఉన్నాం. కుటుంబ సమేతంగా రెండు నెలల పాటు సాధారణ జీవితం గడిపే అనుభూతిని పొందడం అనేది నాకు, నా కుటుంబానికి విచిత్రమైన అనుభవం. ఇది ఒక కల లాంటింది. కుటుంబం కోణంలో ఇద్దరు పిల్లలను కలిగి ఉండటం అనేది పూర్తి భిన్నంగా ఉంటుంది. కలిసి ఉండగల సామర్థ్యం, మీ పెద్ద పిల్లలతో మీరు ఏర్పరచుకునే కనెక్షన్లు భిన్నంగా ఉంటాయి. రోడ్డుపై సాధారణ వ్యక్తిగా ఉండటం, ఎవరూ గుర్తించకపోవడం అనేది అద్భుతమైన అనుభవం. నేను చెప్పాలనుకుంటున్నది ఒకటే.. నేను నిరంతరం ఎదుగుతాను, నా బెస్ట్ ఇవ్వడానికి ప్రయత్నిస్తా" అని విరాట్ కోహ్లీ చెప్పుకొచ్చాడు.

కాగా విరాట్ కోహ్లీ-అనుష్క శర్మలు 2017లో వివాహ బంధంతో ఒక్కటయ్యారు. 2021లో వీరికి వామిక అనే అమ్మాయి జన్మించింది. రెండో సంతానంగా గత నెలలో అకాయ్ అనే అబ్బాయి వీరింట్లో అడుగుపెట్టాడు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-03-26T08:46:35Z dg43tfdfdgfd