భారత్‌లో 'హైబ్రిడ్ పిచ్' ఏర్పాటు.. ఏ స్టేడియం, దీని వల్ల లాభాలేంటి?
హైబ్రిడ్ పిచ్.. గతంలో కూరగాయలు, పండ్లు, మొక్కలు వంటి విషయాల్లో ఈ పేరు ఎక్కువగా వినిపించేది. గతంలో ఉన్నదాని కంటే కూడా మెరుగైన వాటిని రూపొందించినప్పుడు ఈ హైబ్రిడ్ అనే పదాన్ని వాడతారు. అయితే ఇప్పుడు ఈ హైబ్రిడ్ అనే పదం క్రికెట్‌లోకి కూడా వచ్చింది. తాజాగా "హైబ్రిడ్ పిచ్" అనే మాట తెరపైకి వచ్చింది. అసలు హైబ్రిడ్ పిచ్ అంటే ఏమిటి? దాని విశేషాలు ఏమిటి? ఈ కథనంలో చూద్దాం..
సంప్రదాయ పిచ్‌లతో పోలిస్తే "హైబ్రిడ్ పిచ్" తయారీ కాస్త భిన్నంగా ఉంటుంది. దీని తయారీలో గడ్డి, పచ్చికతో పాటు 5 శాంత సింథటిక్‌ను సైతం ఉపయోగిస్తారు. దీంతో పిచ్ ఎక్కువ సమయం ఫ్రెష్‌గా ఉండి.. మన్నిక పెరుగుతుంది. నేలతో సంబంధం లేకుండా (ఎలాంటి నేలలో అయినా) ఒకేలా ఉండటం ఈ పిచ్ ప్రత్యేకత. తయారీ కాస్త భిన్నంగా ఉన్నా.. సంప్రదాయ పిచ్‌ల తరహాలోనే.. ఈ "హైబ్రిడ్ పిచ్" సైతం స్పందిస్తుందని తయారీ దారులు చెబుతున్నారు.
ఈ పిచ్ ఇప్పటికే ఇంగ్లాండ్‌లో అందుబాటులోకి వచ్చింది. తాజాగా భారత్‌లో కూడా అడుగుపెట్టింది. అంతర్జాతీయ క్రికెట్ కౌన్సిల్ (ఐసీసీ) అనుమతి అనంతరం ఈ "హైబ్రిడ్ పిచ్"ను ధర్మశాలలోనే హెచ్‌పీసీఏ స్టేడియంలో అందుబాటులోకి తెచ్చారు. ఐపీఎల్ ఛైర్మన్ అరుణ్ ధుమాల్‌తో పాటు.. ఈ పిచ్ తయారీదారు ఎస్ఐఎస్ గ్రాస్ సంస్థకు డైరెక్టర్‌గా ఉన్న మాజీ ఇంగ్లాండ్ క్రికెటర్ పాల్ టేలర్ సమక్షంలో ఈ పిచ్‌ను ఆవిష్కరించారు.
సాధారణ పిచ్‌లతో పోలిస్తే.. ఈ "హైబ్రిడ్ పిచ్" మూడు రెట్లు మన్నిక ఉంటుందట. పిచ్‌ల నిర్వహణలో కూడా మైదాన సిబ్బందిపై పని భారం తక్కువగా ఉందని పాల్ టేలర్ చెబుతున్నారు. సాధారణ పిచ్‌ల మాదిరిగానే.. అవసరాలకు తగ్గట్లుగా పిచ్‌ను మార్చుకోవచ్చు. బౌలర్లకు అనుకూలంగా గడ్డి తగ్గించడం, పెంచుకోవడం చేసుకోవచ్చు. ప్రస్తుతం వన్డేలు, టీ20ల్లో ఈ తరహా పిచ్‌లను ఉపయోగించేందుకు ఐసీసీ గ్రీన్ సిగ్నల్ ఇచ్చింది. ఈ ప్రయోగం సత్ఫలితాలను ఇస్తే.. సుదీర్ఘ ఫార్మాట్‌లోనూ ఈ పిచ్‌లు అందుబాటులోకి వచ్చే ఛాన్స్ ఉంది. ఈ విషయంపై కొన్ని రోజుల్లో స్పష్టత వచ్చే అవకాశం ఉంది.
కాగా ఇంగ్లాండ్‌లోని లార్డ్స్, ఓవల్ స్టేడియాల్లో హైబ్రిడ్ పిచ్‌లను ఇప్పటికే ఏర్పాటు చేశారు. కౌంటీ మ్యాచులు సైతం ఇవే పిచ్‌లపై జరుగుతున్నాయి. కానీ ధర్మశాలలో ఏర్పాటు చేసిన పిచ్‌పై కేవలం ఆటగాళ్లు ప్రాక్టీస్ మాత్రమే చేస్తారు. దీని పనితీరును బట్టి మ్యాచుల్లోనూ ఉపయోగించాలా? వద్దా? అనేదానిపై నిర్ణయం తీసుకోనున్నారు.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి. 2024-05-07T06:06:06Z dg43tfdfdgfd