ఢిల్లీలో హైదరాబాద్ పరుగుల సునామీ.. SRH 266/7.. ఆ రికార్డులన్నీ బద్దలు..!

ఇండియన్‌ ప్రీమియర్‌ లీగ్‌ 2024 సన్‌ రైజర్స్ హైదరాబాద్‌ బ్యాటర్ల విధ్వంసం కొనసాగుతోంది. ఆర్సీబీతో జరిగిన గత మ్యాచ్‌లో ఐపీఎల్‌ చరిత్రలోనే అత్యధిక స్కోరు (287) నమోదు చేసిన ఎస్‌ఆర్‌హెచ్‌.. శనివారం ఢిల్లీ క్యాపిటల్స్‌తో జరిగిన మ్యాచ్‌లోనూ మరోసారి 200 పైచిలుకు స్కోరు నమోదు చేసింది. ఓపెనర్లు ట్రావిస్‌ హెడ్‌, అభిషేక్‌ శర్మలు విధ్వంసం సృష్టించడంతో నిర్ణీత 20 ఓవర్లలో 266/7 పరుగులు నమోదు చేసింది. ఎస్‌ఆర్‌హెచ్ బ్యాటర్ల ధాటికి ఈ మ్యాచ్‌లో పలు రికార్డులు బద్దలయ్యాయి.

ఈ మ్యాచ్‌లో టాస్‌ గెలిచిన ఢిల్లీ క్యాపిటల్స్‌ కెప్టెన్‌ రిషభ్‌ పంత్‌ ఎస్‌ఆర్‌హెచ్‌కు బ్యాటింగ్‌ అప్పగించాడు. ఎస్‌ఆర్‌హెచ్‌ బ్యాటర్లను అడ్డుకునే బౌలింగ్‌ యూనిట్‌ తమకు ఉందని అనుకున్నాడో లేదా ఛేజింగ్‌ ఈజీగా ఉంటుందని అనుకున్నాడో తెలీదు గానీ.. బౌలింగ్‌ ఎంచుకున్నాడు. అయితే ఈ సీజన్‌లో చెలరేగిపోతున్న సన్‌రైజర్స్‌ ఓపెనర్లు.. ఈ మ్యాచ్‌లో విధ్వంసం 2.0 చూపించారు.

ఇద్దరూ ఎడాపెడా సిక్సర్లు కొట్టడంతో ఐదు ఓవర్లలోనే సన్‌రైజర్స్‌ వంద పరుగుల మార్కును అందుకుంది. దీంతో ఓవర్ల పరంగా వేగవంతమైన సెంచరీ నమోదు చేసిన జట్టుగా సన్‌రైజర్స్‌ నిలిచింది. 2014లో చెన్నై సూపర్‌ కింగ్స్ జట్టు 6 ఓవర్లలో పంజాబ్‌పై వంద పరుగులు చేసింది. ఆ తర్వాత కూడా ఇదే జోరు కొనసాగించిన హైదరాబాద్ ఓపెనర్లు పవర్‌ ప్లే ముగిసే సరికి జట్టు స్కోరును 125/0కు పెంచారు. టీ20 క్రికెట్‌ చరిత్రలోనే అత్యధిక స్కోరు ఇదే కావడం గమనార్హం.

పవర్‌ ప్లేలో ముగిసే సరికి 125 పరుగులు చేసిన సన్‌రైజర్స్‌ హైదరాబాద్‌.. ఈ మ్యాచ్‌లో 300 పైచిలుకు స్కోరు చేసేలా కనిపించింది. కానీ ఈ దశలోనే ఢిల్లీ క్యాపిటల్స్‌ వికెట్లు పడగొట్టి బలంగా పుంజుకుంది. స్వల్ప వ్యవధిలోనే వికెట్లు తీసి పోటీలోకి వచ్చింది. 12 బంతుల్లో 46 రన్స్‌ చేసిన అనంతరం అభిషేక్‌ శర్మ జట్టు స్కోరు 131 వద్ద తొలి వికెట్‌గా వెనుదిరిగాడు. ఎయిడెన్‌ మార్‌క్రమ్‌ (1), ట్రావిస్‌ హెడ్‌ (32 బంతుల్లో 89 రన్స్‌), హెన్రిచ్‌ క్లాసెన్‌ (15) ఔట్‌ అయ్యారు. దీంతో 154/4తో నిలిచింది.

ఈ దశలో సన్‌రైజర్స్‌ ఆశించినంత వేగంగా పరుగులు రాబట్టలేకపోయింది. చివర్లో నితీశ్‌ రెడ్డి 27 బంతుల్లో 37, షాబాజ్‌ అహ్మద్‌ హాఫ్‌ సెంచరీ (59) చేయడంతో నిర్ణీత 20 ఓవర్లలో సన్‌రైజర్స్‌ 7 వికెట్ల నష్టానికి 266 పరుగులు చేసింది. ఢిల్లీ క్యాపిటల్స్‌ బౌలర్లలో కుల్‌దీప్‌ యాదవ్‌ 4 వికెట్లు, ముకేశ్‌ కుమార్ 1, అక్షర్‌ పటేల్‌ 1 వికెట్‌ తీశారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-20T16:19:17Z dg43tfdfdgfd