కమిన్స్ ప్లాన్‌కు అవాక్కైన కామెంటేటర్లు.. కెప్టెన్ నిర్ణయాన్ని ప్రశ్నించి, మరుసటి బంతికే గప్‌చుప్..!
ఐపీఎల్ 2023లో పేలవ ప్రదర్శనతో నిరాశపర్చిన సన్‌రైజర్స్ హైదరాబాద్.. ఈ సీజన్లో సొంత గడ్డ మీద జరిగిన తొలి మ్యాచ్‌లో అదరగొట్టే ప్రదర్శన చేసింది. ట్రావిస్ హెడ్ (24 బంతుల్లో 62), అభిషేక్ శర్మ (23 బంతుల్లో 63), క్లాసేన్ (28 బంతుల్లో 42) ఆకాశమే హద్దుగా చెలరేగడంతో ఐపీఎల్ చరిత్రలో అత్యధిక స్కోరును నమోదు చేసింది. 2013లో పుణే వారియర్స్‌పై చేసిన 263/5 ఇప్పటి వరకూ అత్యధిక స్కోరు కాగా.. 277/3 చేసిన సన్‌రైజర్స్ ఆ రికార్డును బ్రేక్ చేసింది. లక్ష్య చేధనలో ముంబై కూడా 246/5 చేయడంతో టీ20ల్లో అత్యధిక పరుగులు నమోదైన మ్యాచ్‌‌గా ఇది రికార్డులకెక్కింది.
భారీ లక్ష్యాన్ని చేధనను ముంబై ఇండియన్స్ ధీటుగా ఆరంభించింది. ఇషాన్ కిషన్, రోహిత్ శర్మ మెరుపులు మెరిపించారు. ముఖ్యంగా ఇషాన్ కిషాన్.. భువనేశ్వర్ కుమార్ బౌలింగ్‌ను లక్ష్యంగా చేసుకొని 4,6,6,0,6 బాదడంతో 3 ఓవర్లలోనే ముంబై ఇండియన్స్ 50 పరుగులు చేసింది. దీంతో సన్‌రైజర్స్ కెప్టెన్ ప్యాట్ కమిన్స్ వెంటనే బౌలర్‌ను మార్చాడు. లెఫ్ట్ ఆర్మ్ స్పిన్నర్ షహబాజ్ అహ్మద్‌ను రంగంలోకి దింపాడు.
తొలి బంతికే సిక్స్‌తో షహబాజ్‌కు ఇషాన్ కిషన్ వెల్‌కమ్ చెప్పాడు. లెఫ్ట్ హ్యాండర్ బ్యాటర్ క్రీజ్‌లో ఉన్నప్పుడు లెఫ్ట్ హ్యాండ్ స్పిన్నర్‌ను బౌలింగ్‌కు దింపడం పట్ల కామెంటేటర్ బ్రియాన్ లారా విస్మయం వ్యక్తం చేశారు. అప్పటికే సిక్సుల మోత మోగిస్తోన్న ఇషాన్ (13 బంతుల్లో 34).. ఈ ఓవర్లో మరింత చెలరేగిపోతాడని కామెంటేటర్లు భావించారు. ఓ రకంగా చెప్పాలంటే కమిన్స్ నిర్ణయాన్ని తప్పుబట్టారు. కానీ మరుసటి బంతికి కూడా భారీ షాట్ ఆడబోయిన ఇషాన్ కిషన్.. మర్‌క్రమ్‌కు క్యాచ్ ఇచ్చి ఔటయ్యాడు. మరోసారి స్లాగ్ స్వీప్ షాట్ ద్వారా సిక్స్ కొట్టే ప్రయత్నంలో ఇషాన్.. బంతిని సరిగా మిడిల్ చేయలేకపోయాడు. దీంతో డీప్ మిడ్ వికెట్ దగ్గర ఫీల్డర్‌ మర్‌క్రమ్ చేతికి క్యా్చ్ ఇచ్చాడు. దీంతో ఆశ్చర్యపోవడం లారా సహా మిగతా కామెంటేటర్ల వంతు అయ్యింది.
నిజం చెప్పాలంటే ఇషాన్‌ను ఔట్ చేసేందుకు కమిన్స్ పెద్ద రిస్కే తీసుకున్నాడు. పడితే వికెట్.. పోతే 20-25 పరుగులు అనుకుంటే గానీ లెఫ్ట్ హ్యాండ్ బ్యాటర్‌కు లెఫ్ట్ ఆర్మ్ స్పిన్నర్‌తో బౌలింగ్ చేయించలేరు. షహబాజ్ వేసిన అదే ఓవర్ చివరి బంతికి రోహిత్ శర్మ కూడా ఔటయ్యేవాడే. రోహిత్ పుల్ షాట్ ఆడబోగా బ్యాట్ ఎడ్జ్ తీసుకోవడంతో.. బంతి మిడాన్ దిశగా గాల్లోకి లేచింది. అబ్దుల్ సమద్ వెనక్కి పరిగెత్తుకుంటూ వెళ్లి క్యాచ్ అందుకున్నాడు. కానీ కొద్దిలో జారవిడిచాడు.
మరుసటి ఓవర్ కమిన్స్ బౌలింగ్ చేయగా.. తాను ఎదుర్కొన్న తొలి బంతికే సిక్స్ కొట్టిన రోహిత్ శర్మ.. మరుసటి బంతికి భారీ షాట్ ఆడబోయి అభిషేక్ శర్మకు క్యాచ్ ఇచ్చి పెవిలియన్ చేరాడు. ముంబై ఇండియన్స్ ఓపెనర్లు ఇద్దరు వరుస ఓవర్లలో పెవిలియన్ చేర్చడంతో సన్‌రైజర్స్ కాస్త ఊపిరి పీల్చుకుంది.
డెత్ ఓవర్లలోనూ కమిన్స్ సత్తా చాటాడు. 15వ ఓవర్ బౌలింగ్ చేసిన కమిన్స్ 3 పరుగులిచ్చి ఒక వికెట్ తీయగా.. 19వ ఓవర్లో 7 పరుగులు మాత్రమే ఇచ్చాడు. ముంబైతో మ్యాచ్‌లో కెప్టెన్‌గా రిస్క్‌తో కూడిన నిర్ణయాలు తీసుకున్న కమిన్స్.. (4 ఓవర్లో 35/2) బౌలర్‌గానూ సత్తా చాటాడు.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి. 2024-03-28T03:50:41Z dg43tfdfdgfd