ఔట్ అయ్యాక కోపంతో ఊగిపోయిన పంత్! బ్యాట్‌ను తీసి.. (వీడియో)

ఢిల్లీ క్యాపిటల్స్ కెప్టెన్ రిషభ్ పంత్ సహనం కోల్పోయాడు. గురువారం రాజస్థాన్ రాయల్స్‌తో జరిగిన మ్యాచులో కీలక సమయంలో ఔట్ అయిన ఈ లెఫ్ట్ హ్యాండర్.. తన ఫ్రస్టేషన్‌ను ప్రదర్శించాడు. బ్యాటును అక్కడే ఉన్న కర్టెన్‌కు కొట్టాడు. ఇందుకు సంబంధించిన వీడియో ప్రస్తుతం నెట్టింట వైరల్‌గా మారింది. అసలేం జరిగిందంటే..

ఈ మ్యాచులో తొలుత బ్యాటింగ్ చేసిన రాజస్థాన్ రాయల్స్ నిర్ణీత 20 ఓవర్లలో 185 పరుగులు స్కోరు చేసింది. అనంతరం బ్యాటింగ్‌కు దిగిన ఢిల్లీ క్యాపిటల్స్ కీలక సమయంలో వికెట్లు కోల్పోయింది. ఈ మ్యాచులో 14 ఓవర్‌లో రిషభ్ పంత్ ఔట్ అయ్యాడు. అనుకున్నంత వేగంగా ఆడలేకపోయిన పంత్.. గేర్ మార్చి పరుగులు చేయాల్సిన సమయంలో ఔట్ అయ్యాడు. యుజ్వేంద్ర చాహల్ బౌలింగ్‌లో వికెట్ కీపర్ సంజూ శాంసన్‌కు క్యాచ్ ఇచ్చాడు. ఈ మ్యాచులో 26 బంతుల్లో 28 పరుగులు చేశాడు పంత్. ఈ మ్యాచులో ఢిల్లీ 12 పరుగుల తేడాతో ఓడిపోయింది.

దీంతో ఔట్ అయ్యాక కోపంగా డగౌట్ వైపు వెళ్లిన పంత్.. బ్యాటును అక్కడే ఉన్న కర్టెన్‌కు బలంగా కొట్టాడు. ఇందుకు సంబంధించిన వీడియో ప్రస్తుతం సోషల్ మీడియాలో వైరల్‌గా మారింది.

కాగా రిషభ్ పంత్ 2022 డిసెంబర్‌లో రోడ్డు ప్రమాదానికి గురైన విషయం తెలిసిందే. సుమారు 15 నెలల తర్వాత గ్రౌండ్‌లోకి రీఎంట్రీ ఇచ్చిన పంత్.. ఆశించిన మేర రాణించలేకపోతున్నాడు. తొలి మ్యాచులో 18పరుగులు చేసిన పంత్.. రెండో మ్యాచులో 26 బంతుల్లో 28 రన్స్ చేసి ఔట్ అయ్యాడు. కాగా ఈ మ్యాచ్ ఢిల్లీ క్యాపిటల్స్ తరఫున రిషభ్ పంత్‌కు 100వ మ్యాచ్ కావడం గమనార్హం. ఈ సీజన్‌లో ఇప్పటివరకు రెండు మ్యాచులు ఆడిన ఢిల్లీ క్యాపిటల్స్ రెండింట్లోనూ ఓడిపోయింది. ఢిల్లీ జట్టు తన తర్వాతి మ్యాచులో మార్చి 31న చెన్నై సూపర్ కింగ్స్‌తో తలపడనుంది.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-03-29T01:22:46Z dg43tfdfdgfd