అశుతోష్ శర్మ: బుమ్రా బౌలింగ్‌లో స్వీప్ షాట్‌ సిక్స్ కొట్టిన మొనగాడు.. మనోడి ఆటకు ప్రత్యర్థి కూడా ఫిదా..!

ఐపీఎల్ 2024లో భాగంగా పంజాబ్ కింగ్స్‌తో జరిగిన మ్యాచ్‌లో ముంబై ఇండియన్స్ 9 పరుగుల తేడాతో గెలిచి ఊపిరి పీల్చుకుంది. ముందుగా బ్యాటింగ్ చేసిన ముంబై జట్టు.. రోహిత్ (25 బంతుల్లో 36), సూర్య (53 బంతుల్లో 78), తిలక్ వర్మ (18 బంతుల్లో 34 నాటౌట్) రాణించడంతో నిర్ణీత 20 ఓవర్లలో 7 వికెట్ల నష్టానికి 192 పరుగులు చేసింది. భారీ లక్ష్యంతో బరిలోకి దిగిన పంజాబ్ జట్టు 19.1 ఓవర్లలో 183 పరుగులకు ఆలౌటయ్యింది.

లక్ష్య చేధనలో పంజాబ్ కింగ్స్ 14 పరుగులకే 4 వికెట్లు కోల్పోయి కష్టాల్లో పడింది. 77 రన్స్‌కే పంజాబ్ ఆరు వికెట్లు చేజార్చుకోవడంతో.. ముంబై ఈజీగా గెలుస్తుందని భావించారంతా. అయితే శశాంక్ సింగ్ (25 బంతుల్లో 41), అశుతోష్ శర్మ (28 బంతుల్లో 61) అసాధారణంగా పోరాడారు. జట్టు స్కోరు 111 పరుగుల వద్ద శశాంక్ ఔటైనా.. అశుతోష్ వెనక్కి తగ్గలేదు. అతడు క్రీజ్‌లో ఉన్నంత సేపు పంజాబ్‌‌కు విజయంపై ఆశలున్నాయి.

ఫోర్ల కంటే సిక్సర్లు కొట్టడానికే ఎక్కువ ప్రాధాన్యం ఇచ్చిన అశుతోష్.. ఈ మ్యాచ్‌లో 2 ఫోర్లు, 7 సిక్సులు బాదాడు. చివరకు బుమ్రాను సైతం అతడు వదల్లేదు. బుమ్రా బౌలింగ్‌లో స్వీప్ షాట్‌తో సిక్సర్ బాదిన అశుతోష్ అందర్నీ ఆశ్చర్యానికి గురి చేశాడు. ఇన్నింగ్స్ 12వ ఓవర్ నాలుగో బంతిని బుమ్రా నో బాల్ వేయగా.. తర్వాతి ఫ్రీ హిట్‌గా మారింది. బుమ్రా యార్కర్‌తో ఇబ్బంది పెట్టే ప్రయత్నం చేయగా.. మోకాలిపై కూర్చొని దాన్ని ఫుల్ టాస్‌గా మార్చిన అశుతోష్.. స్వీప్ షాట్‌తో బ్యాక్వర్డ్ స్క్వేర్ లెగ్ వైపు సిక్స్‌గా మలిచాడు.

శశాంక్ సింగ్‌తో కలిసి ఏడో వికెట్‌కు 34 పరుగులు జోడించిన అశుతోష్.. ఆ తర్వాత హర్‌ప్రీత్ బ్రార్ (20 బంతుల్లో 21)తో కలిసి 57 పరుగుల భాగస్వామ్యం నెలకొల్పాడు. దీంతో పంజాబ్ విజయానికి 18 బంతుల్లో 25 పరుగులు అవసరమైన దశలో.. 18వ ఓవర్ తొలి బంతికి అశుతోష్‌ను కోయెట్జీ ఔట్ చేయడంతో మ్యాచ్ ముంబై వైపు మొగ్గింది.

మ్యాచ్ అనంతరం అశుతోష్ మాట్లాడుతూ.. బుమ్రా బౌలింగ్‌లో స్వీప్ షాట్ ఆడాలనేది తన కల అని చెప్పాడు. ఈ షాట్లను తాను ప్రాక్టీస్ చేస్తున్నానన్న అశుతోష్.. తాను క్రీజ్‌లో ఉన్నంత సేపు పంజాబ్‌ను గెలిపిస్తాననే ధీమాతో ఉన్నానని చెప్పాడు. ఈ మ్యాచ్‌లో అశుతోష్ నమ్మశక్యం కాని రీతిలో ఆడాడంటూ.. పంజాబ్ బ్యాటర్‌పై ముంబై కెప్టెన్ హార్దిక్ పాండ్య ప్రశంసలు గుప్పించాడు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-19T05:48:02Z dg43tfdfdgfd