WTC FINAL కోసం భారత జట్టులోకి యశస్వి జైశ్వాల్.. రుతురాజ్ గైక్వాడ్ స్థానంలో ఎంపిక
ఐపీఎల్ ఫైనల్ ముగిసిన కొద్ది రోజులకే డబ్ల్యూటీసీ ఫైనల్ ప్రారంభం కానున్న సంగతి తెలిసిందే. వరుసగా రెండోసారి డబ్ల్యూటీసీ ఫైనల్ చేరిన భారత్.. ఈసారి ఎలాగైనా గెలవాలనే పట్టుదలతో ఉంది. ఇప్పటికే కోహ్లి సహా ఐపీఎల్ ప్లేఆఫ్స్ చేరని జట్లకు చెందిన ఆటగాళ్లకు లండన్ చేరుకొని ప్రాక్టీస్ మొదలుపెట్టారు. ఐపీఎల్ ఫైనల్ ముగిశాక మిగతా ఆటగాళ్లు సైతం లండన్ బయల్దేరి వెళ్లనున్నారు. కాగా వరల్డ్ టెస్ట్ ఛాంపియన్‌షిప్ ఫైనల్ కోసం చెన్నై సూపర్ కింగ్స్ బ్యాటర్ రుతురాజ్ గైక్వాడ్‌ను స్టాండ్ బై ఓపెనర్‌గా ప్రకటించిన సంగతి తెలిసిందే.
26 ఏళ్ల గైక్వాడ్ డబ్ల్యూటీసీ ఫైనల్‌కు దూరం కానున్నాడు. జూన్ 3-4 తేదీల్లో వివాహం చేసుకోనున్న ఈ మహారాష్ట్ర ఆటగాడు.. జూన్ ఐదో తేదీలోగా లండన్ చేరుకోలేడు. మరోవైపు జూన్ ఏడో తేదీనే ఆస్ట్రేలియాతో ఫైనల్ మ్యాచ్ మొదలు కానుంది. దీంతో అతడి స్థానంలో రాజస్థాన్ రాయల్స్ ఓపెనర్ యశస్వి జైశ్వాల్‌ను రుతురాజ్ స్థానంలో బ్యాకప్ ఓపెనర్‌గా ఎంపిక చేశారు.
పెళ్లి కారణంగా తాను జూన్ 5లోగా భారత జట్టుతో కలవలేననే విషయాన్ని గైక్వాడ్ బీసీసీఐకి తెలిపాడు. దీంతో టీమిండియా హెడ్ కోచ్ రాహుల్ ద్రావిడ్ సబ్‌స్టిట్యూట్ కావాలని కోరాడు. ఫలితంగా జైశ్వాల్‌ను బ్యాకప్ ఓపెనర్‌గా జట్టులోకి తీసుకున్నారు.
ఐపీఎల్ 2023లో యశస్వి జైశ్వాల్ అదరగొట్టే ప్రదర్శన చేశాడు. ఈ లెఫ్ట్ హ్యాండ్ బ్యాటర్ 14 మ్యాచ్‌ల్లో 625 పరుగులు చేశాడు. సీజన్ మొత్తం అద్భుతంగా రాణించిన ఈ రాజస్థాన్ రాయల్స్ బ్యాటర్.. 5 హాఫ్ సెంచరీలు, ఓ సెంచరీ నమోదు చేశాడు. రంజీ ట్రోఫీలో ఐదు మ్యాచ్‌లు ఆడిన జైశ్వాల్ 45 యావరేజ్‌తో 404 రన్స్ చేశాడు. అందులో ఒక హాఫ్ సెంచరీ ఒక శతకం ఉంది.
జైశ్వాల్‌కు ఇప్పటికే యూకే వీసా ఉండటంతో.. లండన్ బయల్దేరి వెళ్లడానికి ముందే.. రెడ్ బాల్‌తో ప్రాక్టీస్ చేయడం మొదలుపెట్టమని టీమ్ మేనేజ్‌మెంట్ అతడికి సూచించింది. దీంతో ఆదివారం ముంబైలోని జింఖానా మైదానంలో రాజస్థాన్ రాయల్స్ హై పెర్ఫార్మెన్స్ డైరెక్టర్ జుబిన్ బరూచాతో కలిసి జైశ్వాల్ రెడ్ బాల్‌తో బ్యాటింగ్ ప్రాక్టీస్ చేశాడు. ఆదివారం రాత్రికే అతడు లండన్ బయల్దేరి వెళ్తాడని సమాచారం.
ఇషాన్ కిషన్, రోహిత్ శర్మ నేడు (మే 28న) లండన్ బయల్దేరి వెళ్లనున్నారని తెలుస్తోంది. సూర్యకుమార్ యాదవ్, మహ్మద్ షమీ, శుభ్‌మన్ గిల్, రవీంద్ర జడేజా, అజింక్య రహానే తదితరులు మే 30న లండన్ పయనమయ్యే అవకాశం ఉంది.
2023-05-28T06:46:51Z dg43tfdfdgfd