T20 WORLD CUP: సంచలనాల ప్రపంచకప్.. సూపర్-8 వెళ్లే జట్లేవి.. వేటికి అవకాశాలు ఎలా ఉన్నాయంటే?
Super Eight Qualification Scenarios: అమెరికా, వెస్టిండీస్ల్లో జరుగుతున్న టీ-20 ప్రపంచ కప్ లోస్కోర్లతో హైవోల్టేజీ మ్యాచ్లకు వేదికగా నిలుస్తోంది. అమెరికా న్యూయార్క్లో చాలా జట్లు కష్టం 120 స్కోరు చేస్తున్నాయి. ఇంకా లోస్కోర్లను కూడా ఇండియా, సౌతాఫ్రికా వంటివి కాపాడుకున్నదీ చూశాం. ఇక ఇంగ్లాండ్, పాకిస్థాన్, న్యూజిలాండ్, శ్రీలంక వంటి పెద్ద జట్లు ఇప్పటివరకు ఒక్క మ్యాచ్ కూడా గెలవకపోవడం గమనార్హం. ఈ టోర్నీలో ఇప్పటికే ఎన్నో సంచలనాలు నమోదయ్యాయి. చాలా చిన్న జట్లు సూపర్- 8 కు చేరే అవకాశాలు కనిపిస్తున్నాయి. వీటిల్లో అప్ఘానిస్థాన్, అమెరికా, స్కాట్లాండ్ ఉండే ఛాన్స్ ఉంది. పాకిస్థాన్, న్యూజిలాండ్ వంటి వాటికి నిరాశ తప్పేలా లేదు. ఇప్పటివరకు జరిగిన మ్యాచ్లను బట్టి.. సూపర్-8 కు వెళ్లాలంటే ఏ జట్టుకు ఎలాంటి అవకాశాలు ఉన్నాయనేది తెలుసుకుందాం.
గ్రూప్- A
జట్లు: ఇండియా, అమెరికా, కెనడా, పాకిస్థాన్, ఐర్లాండ్
- ఇండియా (4 పాయింట్లు, 1.455 నెట్ రన్ రేట్) - ఇప్పటికే రెండింటికి రెండు మ్యాచ్లు గెలిచి మంచి రన్ రేట్తో గ్రూప్లో అగ్రస్థానంలో నిలిచే అవకాశాలు ఉన్నాయి. అమెరికా లేదా కెనడా ఒక్కటి గెలిచినా సూపర్-8 కు చేరుతుంది. రెండింటిపై గెలిస్తే అగ్రస్థానం పదిలం.
- యునైటెడ్ స్టేట్స్ ఆఫ్ అమెరికా (4 పాయింట్లు, 0.626 రన్ రేట్)- అమెరికా కూడా ఈ టోర్నీని ఘనంగా ప్రారంభించింది. ఇప్పటికే రెండు గెలవగా.. ఇండియా లేదా ఐర్లాండ్పై ఒక్కటి గెలిచినా తదుపరి దశకు చేరుకుంటుంది.
- కెనడా ( 2 పాయింట్లు, -0.274 రన్ రేట్)- ఇండియా, పాకిస్థాన్పై కచ్చితంగా నెగ్గాలి. అప్పుడు నెట్ రన్ రేట్ను బట్టి అవకాశం ఉండొచ్చు.
- పాకిస్థాన్ ( 0 పాయింట్లు, -0.150 నెట్ రన్ రేట్) - పాకిస్థాన్ ఆడిన రెండూ ఓడిపోగా.. తదుపరి కెనడా, ఐర్లాండ్పై గెలవడంతో పాటు.. కచ్చితంగా మంచి రన్ రేట్ సాధించాలి. అప్పుడే సూపర్-8 కు ఛాన్స్ ఉంటుంది. మరోవైపు ఇండియా లేదా అమెరికా తమ మిగతా మ్యాచ్ల్లో ఓడిపోవాలి.
- ఐర్లాండ్ ( 0 పాయింట్లు, -.1.712 రన్ రేట్) - ఐర్లాండ్ మిగతా రెండు మ్యాచ్ల్లో అమెరికా, పాకిస్థాన్పై కచ్చితంగా గెలిచి.. మిగతా జట్లు ఓడిపోవాలని కోరుకోవాలి. ఇంకా రన్ రేట్ మెరుగుపర్చుకోవాలి.
గ్రూప్- B
జట్లు: స్కాట్లాండ్, ఆస్ట్రేలియా, నమీబియా, ఇంగ్లాండ్, ఒమన్
- స్కాట్లాండ్ (5 పాయింట్లు, 2.164 నెట్ రన్ రేట్)- 3 మ్యాచ్ల్లో 5 పాయింట్లతో ఉండగా.. ఆఖరి మ్యాచ్ ఆస్ట్రేలియాతో గెలిస్తే సూపర్-8 ఛాన్స్ గ్యారెంటీ. ఇతర ఫలితాల్ని బట్టి కూడా ఈ మ్యాచ్ ఓడినా అవకాశం ఉంటుంది.
- ఆస్ట్రేలియా (4 పాయింట్లు, 1.875 రన్ రేట్) - ఇంకో విజయం సాధిస్తే తదుపరి దశకు చేరుకుంటుంది. ముఖ్యంగా స్కాట్లాండ్పై గెలిస్తే ఈజీగా సూపర్- 8 కు వెళ్తుంది.
- నమీబియా (2 పాయింట్లు, -0.309 రన్ రేట్)- నమీబియా బలమైన ఆస్ట్రేలియా, ఇంగ్లాండ్పై తప్పకుండా గెలిచి తీరాల్సి ఉంటుంది.
- ఇంగ్లాండ్ (1 పాయింట్, -1.800 రన్ రేట్)- ఇంగ్లాండ్ ఆస్ట్రేలియాపై ఓడిపోయింది. మరో మ్యాచ్ రద్దయింది. దీంతో ఇప్పుడు కష్టంగా మారింది. ఒమన్, నమీబియాపై గెలవడం సహా ఆస్ట్రేలియా- స్కాట్లాండ్ మ్యాచ్ ఫలితంపైనా తమ అవకాశాలు ఆధారపడి ఉంటాయి.
- ఒమన్ (0 పాయింట్లు, -1.613 రన్ రేట్)- ఒమన్ ఆడిన మూడింట్లో ఓడిపోయి ఎలిమినేట్ అయింది.
గ్రూప్- C
జట్లు- అప్ఘానిస్థాన్, వెస్టిండీస్, ఉగాండా, పపువా న్యూ గినియా, న్యూజిలాండ్
- అప్ఘానిస్థాన్ (4 పాయింట్లు, 5.225 రన్ రేట్)- పపువా న్యూ గినియా లేదా వెస్టిండీస్.. రెండింట్లో ఒకటి గెలిచినా సూపర్- 8 కు చేరుకుంటుంది.
- వెస్టిండీస్ (4 పాయింట్లు, 3.574 రన్ రేట్)- న్యూజిలాండ్ లేదా అప్ఘానిస్థాన్తో మ్యాచ్ల్లో ఒక్కటి గెలిచినా ఛాన్స్ ఉంటుంది.
- ఉగాండా (2 పాయింట్లు, -4.217 రన్ రేట్)- ఉగాండా కివీస్పై భారీ విజయం సాధించాలి. ఇతర ఫలితాలపై ఆధారపడాలి.
- పపువా న్యూ గినియా (0 పాయింట్లు, -0.434 రన్ రేట్)- ఆడిన రెండింట్లో ఓడిన ఈ జట్టుకు సూపర్-8 కు చేరడం కష్టం. ఏదైనా సంచలనాలు నమోదైతే చెప్పలేం.
- న్యూజిలాండ్ (0 పాయింట్లు, -4.200 రన్ రేట్)- బలమైన కివీస్ జట్టుకు ఆదిలోనే దెబ్బ పడింది. అప్గాన్పై భారీ రన్స్ తేడాతో ఓడటంతో ఛాన్స్ కష్టంగా మారింది. ఇప్పుడు వెస్టిండీస్, ఉగాండా, పపువా న్యూగినియాలపై కచ్చితంగా గెలిస్తేనే రేసులో ఉంటుంది.
గ్రూప్- D
జట్లు- సౌతాఫ్రికా, బంగ్లాదేశ్, నెదర్లాండ్స్, నేపాల్, శ్రీలంక
- సౌతాఫ్రికా (6 పాయింట్లు, 0.603 నెట్ రన్ రేట్)- ఆడిన మూడింట్లో గెలిచి దాదాపు సూపర్-8 బెర్త్ ఖరారు చేసుకుంది. ఆఖరి మ్యాచ్లో ఓడినా పెద్దగా తేడా ఉండకపోవచ్చు.
- బంగ్లాదేశ్ (2 పాయింట్లు, 0.075 రన్ రేట్)- నెదర్లాండ్స్ను కచ్చితంగా ఓడించాలి. నేపాల్పైనా గెలిస్తే ఈజీగా తదుపరి దశకు చేరొచ్చు.
- నెదర్లాండ్స్ (2 పాయింట్లు, 0.024 రన్ రేట్)- ఈ జట్టు బంగ్లాదేశ్, నేపాల్పై గెలిస్తేనే సూపర్- 8 కు చేరుకుంటుంది.
- నేపాల్ (0 పాయింట్లు, -0.539 రన్ రేట్)- నేపాల్ మిగతా అన్ని మ్యాచ్ల్లో కచ్చితంగా గెలవాలి. ఆ జట్టు ప్రదర్శన చూస్తే ఇది కష్టమే.
- శ్రీలంక (0 పాయింట్లు, -0.777 రన్ రేట్)- శ్రీలంక నేపాల్, నెదర్లాండ్స్పై భారీ విజయాలు నమోదు చేస్తే రేసులో ఉంటుంది. ఇతర ఫలితాలు కూడా వీరికి ఫేవర్గా ఉండాలి. రన్ రేట్ కూడా ముఖ్యం.
ఇటువంటి మరిన్ని
వార్తలు సమయం తెలుగులో చదవండి.
లేటెస్ట్ వార్తలు,
సిటీ వార్తలు,
జాతీయ వార్తలు,
బిజినెస్ వార్తలు,
క్రీడా వార్తలు,
రాశిఫలాలు ఇంకా
లైఫ్స్టైల్ అప్డేట్లు మొదలగునవి తెలుసుకోండి.
వీడియోలను TimesXP లో చూడండి.
2024-06-11T09:46:44Z dg43tfdfdgfd