పారిస్ ఒలింపిక్స్ 2024 ప్రారంభమైంది. శుక్రవారం రాత్రి అంగరంగ వైభవంగా ఆరంభ వేడుకలు జరిగాయి. పారిస్లోని సెన్ నదిపై ఈ వేడుకలు జరిగాయి. 6 కిలో మీటర్ల మేర 85 పడవలపై ఈ పరేడ్ జరిగింది. సుమారు 205 దేశాలకు చెందిన 6800 మంది అథ్లెట్లు ఈ పరేడ్లో పాల్గొన్నారు. పీవీ సింధు, శరత్ కమల్లు భారత పతాకదారులుగా వ్యవహరించారు. అయితే ఈ వేడుకల్లో భారత బృందం ధరించిన దుస్తులపై వివాదం నెలకొంది. భారత అథ్లెట్లు ధరించిన దుస్తుల నాణ్యత, డిజైన్ విషయంలో పలువురు అభ్యంతరాలు వ్యక్తం అవుతున్నాయి.
ఒలింపిక్ పరేడ్ ప్రారంభానికి ముందు భారత స్టార్ షట్లర్ పీవీ సింధు.. చీర కట్టుతో ఉన్న ఫొటోలను ట్విట్టర్ వేదికగా పంచుకుంది. లక్షల మంది మధ్యలో భారత జెండాను పట్టుకోవడం.. తన జీవితంలో దక్కిన గౌరవమని ఆమె క్యాప్షన్ ఇచ్చారు. అయితే సింధు ధరించిన చీరను క్వాలిటీ సరిగా లేదని... డిజైన్ కూడా అంతంత మాత్రంగానే ఉందనే వ్యాఖ్యలు వినిపిస్తున్నాయి.
పారిస్ వేడుకల్లో టీమిండియా ధరించే దుస్తులను భారతీయ ప్రముఖ డిజైనర్ తరుణ్ తహిలియన్కి చెందిన లగ్జరీ బ్రాండ్ రూపొందించింది. తరుణ్ తహిలియాన్ లగ్జరీ బ్రాండ్ రెడీ టు వేర్ లేబుల్ తస్వా ఆధ్వర్యంలో వీటిని రూపొందించారు. ఈ దుస్తుల డిజైనింగ్లో భారతీయ సంప్రదాయాలకు పెద్దపీట వేసినట్లు డిజైనర్లు చెప్పారు. త్రివర్ణ పతాకంలో ఉండే.. కాషాయం, ఆకుపచ్చ, తెలుపు వంటి రంగులతో చీరను రూపొందించారు. పురుష అథ్లెట్ల కోసం కుర్తా బూందీ సెట్ తయారు చేశారు. ఈ సరికొత్త డిజైనర్ దుస్తులను కేంద్ర క్రీడల మంత్రి మన్సుఖ్ మాండవీయ జూన్ 30, 2024న ఇండియన్ ఒలింపిక్స్ అసోసియేషన్ ప్రెసిడెంట్ పీటీ ఉషా సమక్షంలో ఆవిష్కరించారు.
అయితే ఈ దుస్తుల డిజైన్ బాగాలేదని.. నాణ్యత కూడా పేలవంగా ఉందని నెటిజన్లు విమర్శలు చేస్తున్నారు. పీవీ సింధు సోషల్ మీడియాలో ఫొటో పెట్టిన తర్వాత.. ఆ ఫొటోకు కామెంట్లు చేస్తున్నారు. డిజైనర్ తరుణ్ తహిలియాన్పై విమర్శలు గుప్పిస్తున్నారు. ఒలింపిక్స్ క్రీడల కోసం రూపొందించిన భారత చీరల కంటే కూడా మెరుగైన చీరలను రూ.200 లకు ముంబై వీధుల్లో అమ్మడం తాను చూశానని.. ప్రముఖ బ్లాగర్, రచయిత నందిత అయ్యార్ పేర్కొన్నారు. భారత్ వంటి గొప్ప దేశ సంస్కృతికి, చరిత్రకు ఇది అవమానకరమని వ్యాఖ్యానించారు. ఈ క్రమంలోనే పారిస్ ఒలింపిక్స్ ప్రారంభ వేడుకల కోసం కోసం మంగోలియా, దక్షిణ కొరియా, మొనాకో, నైజీరియా దేశాలు రూపొందించిన దుస్తులను ఆమె పంచుకున్నారు.
ఈ చీర డిజైన్ ఢిల్లీలో జరిగిన జీ20 సమ్మిట్లో సిబ్బంది ధరించిన దుస్తుల మాదిరిగా ఉందని మరో నెటిజన్ కామెంట్ చేశారు. ఈ డిజైన్ చూసి.. తీవ్ర నిరుత్సాహానికి గురైనట్లు మరో యూజర్ పేర్కొన్నాడు.
యుగపురుషుడు పేరుతో ఉన్న మరో యూజర్ ఆసక్తికర వ్యాఖ్యలు చేశాడు. తాను డిజైనర్ కాదని.. కానీ ఇంతకంటే మెరుగైన దుస్తులు హైదరాబాద్ కోఠిలో రూ.200లకు లభ్యం అవుతాయని పేర్కొన్నాడు. భారతదేశం చాలా అందమైన, అద్భుతమైన చీరలను సృష్టించిందని.. ఈ ఈవెంట్కు దుస్తులను రూపకల్పన చేయమని ప్రభుత్వం తనీరా లాంటి వారిని సంప్రదించి ఉండాల్సిందనే కామెంట్లు వస్తున్నాయి.
ఈ దుస్తులు రూపొందించిన వారికి ఆస్కార్, నోబాల్ ప్రైజ్ ఇవ్వాలని వ్యంగ్యంగా పేర్కొంటున్నారు.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్స్టైల్ అప్డేట్లు మొదలగునవి తెలుసుకోండి. వీడియోలను TimesXP లో చూడండి. 2024-07-27T05:57:08Z dg43tfdfdgfd