MS DHONI: 16 బంతుల్లోనే 57 పరుగులు.. 20వ ఓవర్లో ధోనీ విశ్వరూపం ఇదీ.. IPL లో మాహీ రికార్డుల మోత!

Most Runs Scored in 20th Over in IPL: భారత క్రికెట్లోనే కాకుండా ప్రపంచ క్రికెట్లోనూ గొప్ప ఫినిషర్ అంటే ముందుగా వినిపించే పేరు మహేంద్ర సింగ్ ధోనీ. తన గొప్ప ఆట తీరుతో అంతర్జాతీయ క్రికెట్లో టీమిండియాకు.. ఐపీఎల్‌లో చెన్నై సూపర్ కింగ్స్‌కు ఎన్నో అత్యద్భుత విజయాలు అందించాడు. ఇక ఓడిపోతాం అనుకున్న మ్యాచ్‌ను తన ఇన్నింగ్స్‌తో ధోనీ గెలిపించిన మ్యాచ్‌లు కోకొల్లలు. ఫినిషర్ అన్న పాత్రకు చక్కటి న్యాయం చేస్తూ.. ఆఖరి ఓవర్లలో చెలరేగి ఆడటం ధోనీ నైజం. మిగతా క్రికెటర్లలా కాకుండా.. వయసు పైబడుతున్న కొద్దీ.. మరింత రాటుదేలుతున్నాడు ధోనీ. 42 ఏళ్ల వయసులోనూ మాహీ 20 ఏళ్ల కుర్రాడిలా రాణిస్తున్నాడు. ఐపీఎల్ 2024లో ఇతర స్టార్ క్రికెటర్లతో పోటీపడుతూ అలవోకగా సిక్సర్లు బాదేస్తున్నాడు. ఆడేది తక్కువ బంతులే అయినప్పటికీ.. జట్టుకు విలువైన పరుగులు జోడిస్తున్నాడు. ఆఖర్లో రావడం.. సిక్సర్లు బాదడం.. అజేయంగా పరిగెత్తుకుంటూ డగౌట్‌కు వెళ్లడం ప్రతి మ్యాచ్‌లోనూ ఇదే జరుగుతోంది.

ఈ ఐపీఎల్‌లో ధోనీ చేసిన పరుగులు 87 మాత్రమే. ఆరెంజ్ క్యాప్ రేసులో ఉండకపోవచ్చు. కానీ అతనాడిన ఇన్నింగ్స్‌లు అంతకుమించి అని చెప్పొచ్చు. ఆడిన బంతులు 34 మాత్రమే. మొత్తంగా చెన్నై ఆడిన 7 మ్యాచ్‌ల్లో 5 సార్లు ధోనీ బ్యాటింగ్‌కు వచ్చాడు. ఇందులో విశేషం ఏంటంటే.. ఒక్కసారీ అవుట్ కాలేదు. స్ట్రైక్ రేట్ ఏకంగా 255.88 గా ఉంది. అతడి కంటే ముందు రొమారియో షెఫర్డ్ (280) మాత్రమే ఉండటం గమనార్హం. ఈ ఐపీఎల్‌లో రెచ్చిపోతున్న రసెల్, క్లాసెన్, అభిషేక్ శర్మ, నికోలస్ పూరన్, దినేశ్ కార్తీక్, రోహిత్ శర్మ కంటే కూడా ధోనీ స్ట్రైక్ రేట్ ఎక్కువ.

ఢిల్లీ క్యాపిటల్స్‌పై 191 పరుగుల ఛేదనలో ధోనీ ఆఖర్లో వచ్చి 4 ఫోర్లు, 3 సిక్సర్లతో 16 బంతుల్లోనే 37 పరుగులు చేశాడు. తర్వాత సన్‌రైజర్స్, కోల్‌కతాతో మ్యాచ్‌ల్లోనూ వరుసగా 2 బంతుల్లో 1, 3 బంతుల్లో 1 రన్స్ చేసి నాటౌట్‌గా నిలిచాడు. ఇక ముంబై ఇండియన్స్‌తో మ్యాచ్‌లో ఆఖరి ఓవర్లో హార్దిక్ పాండ్యకు చుక్కలు చూపించాడు. 3 సిక్సర్లతో 4 బంతుల్లోనే 20 రన్స్ చేశాడు. లఖ్‌నవూతో 9 బంతుల్లోనే 3 ఫోర్లు, 2 సిక్సర్లతో 28 పరుగులు చేశాడు.

ఆఖరి ఓవర్ మొనగాడు..

ఇక ధోనీకి ఐపీఎల్‌లో మరో అద్భుత రికార్డు ఉంది. ఐపీఎల్ మొత్తంలో.. 20వ ఓవర్లో అత్యధిక పరుగులు చేసిన ప్లేయర్ ధోనీనే. ఆఖరి ఓవర్లో అత్యధిక సిక్సర్ల రికార్డు కూడా ధోనీ పేరిటే ఉంది. ఆఖరి ఓవర్లో మొత్తం 313 బంతులాడిన ధోనీ.. 772 రన్స్ చేశాడు. స్ట్రైక్ రేట్ 246.64 కాగా.. ఇందులో 53 ఫోర్లు, 65 సిక్సర్లు ఉన్నాయి. అంటే బౌండరీలతోనే దీంట్లో 602 రన్స్ చేశాడన్నమాట. ఈ సీజన్‌లో 20వ ఓవర్లో.. 4 ఫోర్లు, ఆరు సిక్సర్లతో 16 బంతుల్లోనే 57 రన్స్ చేయడం విశేషం. ఇక్కడ ఫోర్లు, సిక్సర్లతోనే ధోనీ 52 పరుగులు చేశాడంటే ఏ రేంజ్‌లో బాదుతున్నాడో అర్థం చేసుకోవచ్చు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-04-20T04:18:27Z dg43tfdfdgfd