KAVYA MARAN: కావ్యా పాప నవ్వింది.. రజినీ సార్ మీరు హ్యాపీనా..? పాత వీడియో వైరల్..!

ఐపీఎల్‌లో సన్‌రైజర్స్ అంటే బౌలింగ్ టీమ్ అనే ముద్ర పడిపోయింది. బ్యాటర్లు కిందా మీదా పడి 130-140 పరుగులు చేస్తే.. బౌలర్లు తమ శక్తియుక్తిలన్నీ ధారబోసి స్వల్ప లక్ష్యాన్ని కాపాడుకోవడానికి శ్రమించే వారు. చాలా సీజన్లపాటు ఇలాగే గడిచింది. వార్నర్ ఔటయితే.. టాప్ ఆర్డర్ త్వరగా పెవిలియన్ చేరితే సన్‌రైజర్స్ ఆ మ్యాచ్‌లో చేతులెత్తేసినట్టే. డేవిడ్ వార్నర్ సన్‌రైజర్స్‌ను వీడిన తర్వాత జట్టు పరిస్థితి మరీ తీసికట్టుగా మారింది. గత సీజన్లో అట్టడుగున నిలిచిన సన్‌రైజర్స్ ఫ్యాన్స్‌ను తీవ్రంగా నిరాశపర్చింది. సన్‌రైజర్స్ ఓడిన తర్వాత కావ్య మారన్ ముఖంలో నిరాశ, బాధను చూసి ఆరెంజ్ ఆర్మీ ఫ్యాన్స్ అయ్యో పాపం అనుకునే వారు.

సూపర్ స్టార్ రజినీకాంత్‌ సైతం కావ్య మారన్ బాధపడుతుండటాన్ని చూడలేకపోయారు. ‘జైలర్’ సినిమా ఆడియో లాంచ్ కార్యక్రమంలో రజినీకాంత్ ఇదే విషయాన్ని ప్రస్తావించారు. సన్‌రైజర్స్ యజమాని కళానిధి మారన్‌కు తలైవా ఓ రిక్వెస్ట్ చేశారు. ‘కళా సార్.. ఐపీఎల్ మ్యాచ్‌ల సమయంలో కావ్య అప్‌సెట్ అవ్వడాన్ని టీవీల్లో చూస్తే బాధగా ఉంది. మంచి ఆటగాళ్లను కొనండి.. జట్టును బలోపేతం చేయండి’ అని రజినీకాంత్ కోరారు.

ఐపీఎల్ 2023 సీజన్‌కు ముందు ఆటగాళ్ల ఎంపికలో సన్‌రైజర్స్ మేనేజ్‌మెంట్ తప్పిదాలు చేసింది. వేలంలో రూ.13.25 కోట్లు పెట్టి కొనుగోలు చేసిన హ్యారీ బ్రూక్ దారుణంగా విఫలం కావడంతోపాటు మిగతా ఆటగాళ్లు సైతం ఆకట్టుకోలేకపోయారు. దీంతో ఆ సీజన్లో సన్‌రైజర్స్ పాయింట్ల పట్టికలో అట్టడుగున నిలిచింది. ఈ నేపథ్యంలోనే 2023 ఐపీఎల్ సీజన్ ముగిశాక.. అదే ఏడాది జులైలో రజినీకాంత్ చేసిన రిక్వెస్ట్ అప్పట్లో వైరల్ అయ్యింది.

సీన్ కట్ చేస్తే.. ఐపీఎల్ 2023కి ముందు నిర్వహించిన ఐపీఎల్ వేలంలో సన్‌రైజర్స్ మంచి ఆటగాళ్లను ఎంపిక చేసుకుంది. ట్రావిస్ హెడ్, ప్యాట్ కమిన్స్, వనిందు హసరంగ, జయదేవ్ ఉనద్కత్ లాంటి ఆటగాళ్లను దక్కించుకుంది. కమిన్స్ కోసం రూ.20.50 కోట్ల భారీ పెట్టినా.. కెప్టెన్సీ కోసం అతణ్ని అంత మొత్తం వెచ్చించాల్సి వచ్చింది.

ఐపీఎల్ వేలంలో కమిన్స్, హెడ్‌లను కొనుగోలు చేయడంతో సనరైజర్స్ జట్టు బలంగా మారింది. ఐపీఎల్ 2024 సీజన్లో సొంతగడ్డపై ఆడిన తొలి మ్యాచ్‌లోనే.. ఐపీఎల్ చరిత్రలోనే అత్యధిక స్కోరును నమోదు చేసింది. దీంతో కావ్య పాప ఆనందంతో గంతులేసింది. ఈ క్షణాన ప్రపంచంలో అత్యంత సంతోషంగా ఉన్న వ్యక్తి కావ్య మారన్ అంటూ.. సోషల్ మీడియాలో నెటిజన్లు పోస్టులు పెడుతున్నారు.

ఇదే సమయంలో కొందరు నెటిజన్లు రజనీకాంత్ గతంలో మాట్లాడిన వీడియోను పోస్టు చేస్తున్నారు. రజినీ కాంత్ రిక్వెస్ట్ చేయడం వల్లే మంచి ఆటగాళ్లను కొనుగోలు చేశారని చెప్పలేం కానీ.. సన్‌రైజర్స్ టీమ్ మేనేజ్‌మెంట్, ఫ్యాన్స్.. ఇలా ఇప్పుడంతా హ్యాపీ. కావ్య పాప అయితే డబుల్ హ్యాపీ. రజినీ సార్.. మీరు కూడా ఇప్పుడు హ్యాపీయేనా..?

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-03-28T06:50:58Z dg43tfdfdgfd