RAWALPINDI TEST: ఓటమి అంచున పాకిస్థాన్.. ఈసారి ఇజ్జత్ పోవడం పక్కా..!
బంగ్లాదేశ్ క్రికెట్ జట్టు చరిత్రాత్మక విజయానికి ముంగిట నిలిచింది. పాకిస్థాన్తో పాకిస్థాన్ గడ్డపై జరుగుతున్న 2 మ్యాచ్లు టెస్టు సిరీస్లో ఇది వరకే తొలి మ్యాచ్లో గెలిచి సంచలనం నమోదు చేసింది బంగ్లాదేశ్. అయితే రెండో టెస్టులోనూ ఆల్రౌండ్ ప్రదర్శన చేస్తున్న ఆ జట్టు క్లీన్ స్వీప్పై కన్నేసింది. రావల్పిండి వేదికగా జరిగిన తొలి టెస్టులో గెలిచి.. టెస్టుల్లో పాకిస్థాన్పై తొలి విజయాన్ని నమోదు చేసింది బంగ్లాదేశ్. ఆ మ్యాచ్ ఫలితానికే పాకిస్థాన్ జట్టుపై విమర్శలు వచ్చాయి. దీంతో రెండో మ్యాచ్లో అయినా గెలిచి.. సిరీస్ను సమం చేయాలని పాకిస్థాన్ క్రికెట్ ఫ్యాన్స్ ఆశించారు. కానీ తొలి టెస్టుకు మించి చెత్త ప్రదర్శన చేస్తున్న పాకిస్థాన్ క్రికెటర్లు.. మరో ఓటమి దిశగా సాగుతున్నారు.
ఈ మ్యాచ్లో తొలుత బ్యాటింగ్ చేసిన పాకిస్థాన్.. 274 పరుగులకు కుప్పకూలింది. బంగ్లాదేశ్ యువ స్పిన్నర్ మెహది హసన్ మిరాజ్ ధాటికి ఆ జట్టు బ్యాటర్లు పెవిలియన్కు క్యూ కట్టారు. బాబర్ ఆజమ్, మహమ్మద్ రిజ్వాన్, షాన్ మసూద్ లాంటి ప్లేయర్లు ఉన్నా.. సొంతగడ్డపై బంగ్లాదేశ్ లాంటి చిన్నజట్టుపై కనీసం 300 పరుగులు కూడా చేయలేకపోయింది పాక్. అనంతరం బంగ్లాదేశ్ను ఓ దశలో 26/6తో నిలిపింది ఆతిథ్య జట్టు. దీంతో మ్యాచ్పై పట్టు సాధించినట్లే అని అంతా భావించారు.
కానీ గెలిచే మ్యాచ్లో ఓడటం.. ఓడే మ్యాచ్లో గెలవడం పాకిస్థాన్ జట్టుకు అలవాటు అన్న విషయం అందరికీ తెలిసిందే. తాజాగా ఈ టెస్టులోనూ అదే ప్రదర్శన చేసింది. 26/6 ఉన్న బంగ్లాదేశ్ను 262 పరుగుల వరకు ఆలౌట్ చేయలేకపోయింది. దీంతో భారీ ఆధిక్యం దక్కుతుందని భావించిన పాక్కు నిరాశే ఎదురైంది. కేవలం 12 పరుగుల ఆధిక్యం మాత్రమే లభించింది. అయితే రెండో ఇన్నింగ్స్లో అయినా.. పాకిస్థాన్ బ్యాటర్లు రాణించారా అంటే అదీ లేదు. తొలి టెస్టులో రెండు ఇన్నింగ్స్లు, రెండో టెస్టులో తొలి ఇన్నింగ్స్లో స్పిన్నర్లకు వికెట్లు సమర్పించుకున్న పాక్ బ్యాటర్లు.. ఈ సారి మాత్రం పేసర్లకు అవకాశం ఇచ్చారు. పదికి పది వికెట్లు వారికే ఇచ్చేశారు.
బాబర్ ఆజమ్ (11), షాన్ మసూద్ (28), రిజ్వాన్ (43) భారీ స్కోర్లు చేయలేకపోయారు. దీంతో పాకిస్థాన్ జట్టు 172 పరుగులకే కుప్పకూలింది. తొలి ఇన్నింగ్స్లో లభించిన 12 రన్స్తో కలిపి బంగ్లాదేశ్ ముందు 185 పరుగుల లక్ష్యాన్ని నిలిపింది. తొలి టెస్టులో విజయం సాధించిన బంగ్లాదేశ్.. 185 పరుగుల లక్ష్య ఛేదనలో గొప్పగా బ్యాటింగ్ చేస్తోంది. నాలుగో రోజు ఆట ముగిసే సమయానికి వికెట్ నష్టపోకుండా 42 పరుగులు చేసింది. ఆ జట్టు గెలవాలంటే ఐదో రోజు మరో 143 పరుగులు చేస్తే చాలు. ప్రస్తుతం బంగ్లాదేశ్ ఫామ్ చూస్తే అదేమంత పెద్ద విషయం కాదని అర్థం అవుతోంది. ఇదే జరిగితే బంగ్లాదేశ్ చేతిలో సొంతగడ్డపై పాకిస్థాన్ 2-0తో సిరీస్ కోల్పోనుంది.
ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్స్టైల్ అప్డేట్లు మొదలగునవి తెలుసుకోండి. వీడియోలను TimesXP లో చూడండి. 2024-09-02T15:59:28Z dg43tfdfdgfd