ISHAN KISHAN: చెత్త బౌలింగ్‌కు తోడు ఇషాన్‌ను గాయపర్చి.. ముంబై కొంప ముంచిన జోర్డాన్!
జోఫ్రా ఆర్చర్ స్థానంలో ముంబై ఇండియన్స్ జట్టులోకి వచ్చిన క్రిస్ జోర్డాన్ క్వాలిఫైయర్-2లో రోహిత్ సేన ఓటమికి కారణమయ్యాడు. 4 ఓవర్లలో 56 పరుగులిచ్చిన జోర్డాన్.. ఫీల్డింగ్ సమయంలో ఇషాన్ కిషన్ గాయపడటానికి కారణమయ్యాడు. ఓవర్ ఛేంజ్ సమయంలో ఫీల్డర్లు తమ తమ స్థానాలకు వెళ్తున్న సమయంలో జోర్డాన్, ఇషాన్ ఒకరినొకరు ఢీకొట్టారు. ఇంగ్లిష్ బౌలర్ మోచేయి ఇషాన్ కంటికి బలంగా తాకింది. దీంతో ఇషాన్ బ్యాటింగ్‌కు రాలేదు.
ఇషాన్ కిషన్ బదులు ఇంపాక్ట్ ప్లేయర్ నెహాల్ వధేరా ఓపెనర్గా బరిలోకి దిగగా.. విష్ణు వినోద్ కంకషన్ సబ్‌స్టిట్యూట్‌గా ఆడాల్సి వచ్చింది. ఓపెనర్గా ఆడిన అనుభవం లేని వధేరా.. బిగ్ మ్యాచ్‌లో విఫలమయ్యాడు. మిడిలార్డర్‌లో బాగా ఆడుతున్న అతడు.. ఓపెనర్గా 4 పరుగులు చేసి, తొలి ఓవర్లోనే షమీ బౌలింగ్‌లో ఔటయ్యాడు. విష్ణు వినోద్ సైతం నిరాశపర్చాడు. కీలక మ్యాచ్‌లో ఓపెనర్ ఇషాన్ కిషన్ గాయపడటం ముంబై ఇండియన్స్‌ను దెబ్బతీసింది. రెగ్యులర్ ఓపెనర్ అయిన అతడు పవర్ ప్లేలో దూకుడుగా ఆడేవాడు. కానీ ఇషాన్ ఆడలేకపోవడంతో.. ముంబై ఇండియన్స్ బ్యాటింగ్ ఆర్డర్ మొత్తాన్ని ప్రభావితం చేసింది.
బిగ్ మ్యాచ్‌లో చెత్త బౌలింగ్ ప్రదర్శన చేయడంతోపాటు.. సొంత ఆటగాడు బ్యాటింగ్ చేయకపోవడానికి కారణమైన క్రిస్ జోర్డాన్‌పై ముంబై ఇండియన్స్ ఫ్యాన్స్ ఆగ్రహం వ్యక్తం చేస్తు్న్నారు. జోర్డాన్‌ను రీప్లేస్‌మెంట్‌గా తీసుకోవాల్సింది కాదంటున్నారు. సీఎస్కే స్లీపర్ సెల్ అయిన జోర్డాన్ 50కిపైగా రన్స్ ఇవ్వడంతోపాటు ఇషాన్ కిషన్‌ను గాయపర్చాడంటూ సెటైర్లు వేస్తున్నారు.
డబ్ల్యూటీసీ ఫైనల్ కోసం గాయపడిన కేఎల్ రాహుల్‌కు రీప్లేస్‌మెంట్‌గా ఇషాన్ కిషన్‌ను బీసీసీఐ ఎంపిక చేసిన సంగతి తెలిసిందే. ఇప్పుడు ఇషాన్ కూడా గాయపడటం టీమిండియాను కలవరానికి గురి చేస్తోంది. కానీ ఇషాన్ కిషన్‌కైన గాయం మరీ తీవ్రమైందని కాదని తెలుస్తోంది. మ్యాచ్ ముగిసిన అనంతరం గుజరాత్ టైటాన్స్ ఆటగాడు శుభ్‌మన్ గిల్.. తన స్నేహితుడైన ఇషాన్ దగ్గరకు వెళ్లి అతడికైన గాయాన్ని పరిశీలించాడు. గుజరాత్ కెప్టెన్ హార్దిక్ పాండ్య సైతం ఇషాన్‌ను హత్తుకొని అతడికైన గాయం గురించి అడిగి తెలుసుకున్నాడు.
క్వాలిఫైయర్-2లో ముందుగా బ్యాటింగ్ చేసిన గుజరాత్ టైటాన్స్ 233 పరుగులు చేసింది. శుభ్‌మన్ గిల్ (129) భారీ సెంచరీతో చెలరేగడంతో.. గుజరాత్ ప్రత్యర్థి ముందు కొండంత లక్ష్యాన్ని ఉంచింది. బౌలింగ్‌లో చేతులెత్తేసిన ముంబై.. బ్యాటింగ్‌లో 18.2 ఓవర్లలో 171 పరుగులకు ఆలౌటయ్యింది. గుజరాత్ పేసర్ మోహిత్ శర్మ 2.2 ఓవర్లలో 10 పరుగులిచ్చి 5 వికెట్లు తీశాడు.