IPL FINAL MATCH PREVIEW: ధోనీ VS హార్దిక్.. ఐపీఎల్ 2023 విజేత ఎవరు..? ఇరు జట్ల బలాబలాలేంటి..?

ఐపీఎల్ 2023 సీజన్ విజేత ఎవరనేది నేడు తేలనుంది. డిఫెండింగ్ ఛాంపియన్స్ గుజరాత్ టైటాన్స్‌తో ధోనీ సారథ్యంలోని చెన్నై సూపర్ కింగ్స్ ఫైనల్లో తలపడనుంది. అహ్మదాబాద్‌లోని నరేంద్ర మోదీ స్టేడియం వేదికగా ఆదివారం రాత్రి 7.30 గంటలకు మ్యాచ్ ప్రారంభం కానుంది. చెన్నై సూపర్ కింగ్స్ ఫైనల్ చేరడం ఇది పదోసారి కాగా.. గుజరాత్ టైటాన్స్ ఫైనల్ చేయడం ఇది వరుసగా రెండోసారి కావడం గమనార్హం. తొలి క్వాలిఫైయర్‌లో గుజరాత్‌పై గెలిచిన సూపర్ కింగ్స్ ఫైనల్లో ఆత్మవిశ్వాసంతో బరిలోకి దిగనుంది. కానీ అద్భుత ఫామ్‌లో ఉన్న గిల్ సెంచరీలతో చెలరేగుతున్న తీరు మాత్రం ధోనీ సేనను కలవరానికి గురి చేసే అంశమే. ఈ సారి చెన్నై కప్ గెలిస్తే.. కెప్టెన్‌గా ధోనీకి ఇది ఐదో టైటిల్ అవుతుంది. అత్యధికసార్లు ఐపీఎల్ ట్రోఫీ నెగ్గిన కెప్టెన్‌గా రోహిత్ రికార్డును మహీ సమం చేస్తాడు. గుజరాత్ గెలిస్తే.. వరుసగా రెండు సీజన్లలో ఐపీఎల్ టైటిల్ నెగ్గిన జట్టుగా చెన్నై, ముంబై సరసన గుజరాత్ నిలుస్తుంది.

క్వాలిఫైయర్ మ్యాచ్‌కు ముందు టైటాన్స్‌తో ఆడిన మూడు మ్యాచ్‌ల్లోనూ ఓడిన చెన్నై సూపర్ కింగ్స్... కీలక మ్యాచ్‌లో మాత్రం జయకేతనం ఎగురవేసింది. ఆ మ్యాచ్‌లో గుజరాత్‌ను గెలిపించలేకపోయిన శుభ్‌మన్ గిల్.. ఎలిమినేటర్ మ్యాచ్‌లో ముంబై ఇండియన్స్‌పై విశ్వరూపం ప్రదర్శించాడు. దీంతో ఘనవిజయం సాధించిన గుజరాత్ సగర్వంగా ఫైనల్ చేరుకుంది.

పర్పుల్ క్యాప్ రేసులో ముగ్గురు గుజరాత్ బౌలర్లు..

బ్యాటింగ్, బౌలింగ్ విభాగాల్లో గుజరాత్ టైటాన్స్ చెన్నై కంటే మెరుగ్గా కనిపిస్తోంది. బ్యాటింగ్‌లో గిల్ సత్తా చాటుతుండగా.. సాహా, విజయ్ శంకర్, సాయి సుదర్శన్ తలో చేయి వేస్తున్నారు. హార్దిక్ పాండ్య సత్తా మేరకు రాణించడం లేదు. ఇక బౌలింగ్‌లో గుజరాత్ టైటాన్స్ అద్భుత ప్రదర్శన చేస్తోంది. పర్పుల్ క్యాప్ రేసులో ముగ్గురు గుజరాత్ బౌలర్లు ముందుడటం వారి బౌలింగ్ ఎంత బలంగా ఉందో చెబుతోంది. మహ్మద్ షమీ 28 వికెట్లు తీయగా.. రషీద్ ఖాన్ 27 వికెట్లు, మోహిత్ శర్మ 24 వికెట్లు పడగొట్టారు. ముంబైతో మ్యాచ్‌లో మోహిత్ శర్మ పది పరుగులు మాత్రమే ఇచ్చి ఐదు వికెట్లు పడగొట్టాడు.

చెన్నై సూపర్ కింగ్స్ విషయానికి వస్తే..

ఆ జట్టు బ్యాటింగ్ భారాన్ని ఎక్కువగా ఓపెనర్లే మోస్తున్నారు. ఈ సీజన్లో డెవాన్ కాన్వే 625 పరుగులు చేయగా.. రుతురాజ్ గైక్వాడ్ 564 రన్స్ చేశాడు. ఆ తర్వాతి స్థానంలో శివమ్ దూబే (386 పరుగులు) ఉన్నాడు. ఆరంభంలో మెరుపులు మెరిపించిన రహానే ఆ తర్వాత అంచనాలను అందుకోలేకపోతున్నాడు. జడేజా బౌలింగ్‌లో సత్తా చాటుతున్నప్పటికీ బ్యాట్ మాత్రం ఝులిపించలేకపోతున్నాడు. అంబటి రాయుడు, మొయిన్ అలీతోపాటు ధోనీ కూడా మునుపటిలా దూకుడుగా ఆడలేకపోతున్నారు. కానీ కీలక మ్యాచ్‌లో ఎవరో ఒక బ్యాటర్ క్లిక్ కావడం చెన్నై సూపర్ కింగ్స్‌కు ఆనవాయితీగా వస్తోంది. బౌలింగ్ విషయానికి వస్తే తుషార్ దేశ్‌పాండే 21 వికెట్లు తీసినప్పటికీ.. 9.61 ఎకానమీతో పరుగులు ఇస్తున్నాడు. జడేజా 19 వికెట్లు తీయగా.. పథిరన 17 వికెట్లు పడగొట్టాడు. పథిరన బుల్లెట్ల లాంటి యార్కర్లను ఎదుర్కోవడం ప్రత్యర్థులకు కష్టమే.

ధోనీ వ్యూహాలకు

ఆశిష్ నెహ్రా-పాండ్య ద్వయం ఎలా చెక్ పెడుతుందో చూడాలి. చెన్నై సూపర్ కింగ్స్ గెలవాంటే కచ్చితంగా శుభ్‌మన్ గిల్‌ను తక్కువ స్కోరుకే పెవిలియన్ చేర్చాలి. గిల్‌కు 47 బంతులేసి 62 పరుగులిచ్చిన దీపక్ చాహర్ అతణ్ని మూడుసార్లు ఔట్ చేశాడు. అంబటి రాయుడు ఫామ్‌లో లేకపోయినప్పటికీ.. రషీద్ ఖాన్ బౌలింగ్‌లో ఎదురు దాడికి దిగే అవకాశం ఉంది. రషీద్ బౌలింగ్‌లో 73 బంతులు ఎదుర్కొన్న రాయుడు 91 పరుగులు చేసి ఒక్కసారే ఔటయ్యాడు.

గుజరాత్

పేసర్ మహ్మద్ షమీ.. డెవాన్ కాన్వేకు 12 బంతులేసి 5 పరుగులు మాత్రమే ఇచ్చి మూడుసార్లు పెవిలియన్ చేర్చాడు. గుజరాత్‌కు శుభారంభం ఇవ్వడంలో షమీ కీలకం కానున్నాడు. రవీంద్ర జడేజా బౌలింగ్‌లో గిల్‌కు మంచి రికార్డు ఉంది. గిల్‌కు 48 బంతులేసిన జడ్డూ ఒక్కసారి కూడా ఔట్ చేయలేకపోయాడు.

ఆదివారం అహ్మదాబాద్‌లో వాతావరణం పొడిగా ఉంటుంది. కానీ జల్లులు పడే అవకాశం కూడా లేకపోలేదు. అహ్మదాబాద్ పిచ్ మీద మరోసారి భారీ స్కోర్లు నమోదు కానున్నాయి.

ఆసక్తికర విశేషాలు..

* మహేంద్ర సింగ్ ధోనీకి ఐపీఎల్‌లో ఇది 250వ మ్యాచ్. ఈ ఘనత సాధించనున్న తొలి ఆటగాడు ధోనీనే.

* గుజరాత్ టైటాన్స్‌తో ఆడిన నాలుగు మ్యాచ్‌ల్లోనూ రుతురాజ్ గైక్వాడ్ హాఫ్ సెంచరీలు చేశాడు.

* ఒక సీజన్లో అత్యధిక పరుగులు చేసిన ఆటగాడిగా విరాట్ కోహ్లి (973) రికార్డును సమం చేయాలంటే గిల్ మరో 122 పరుగులు చేయాలి.

చెన్నై జట్టు అంచనా:

డెవాన్ కాన్వే, రుతురాజ్ గైక్వాడ్, అజింక్య రహానే, శివమ్ దూబే, అంబటి రాయుడు, మొయిన్ అలీ, రవీంద్ర జడేజా, ఎంఎస్ ధోనీ, దీపక్ చాహర్, తుషార్ దేశ్‌పాండే, మహీష్ థీక్షణ, మతీష పథిరన.

గుజరాత్ జట్టు అంచనా:

శుభ్‌మన్ గిల్, వృద్ధిమాన్ సాహా, సాయి సుదర్శన్, హార్దిక్ పాండ్య, విజయ్ శంకర్, డేవిడ్ మిల్లర్, రాహుల్ తెవాతియా, రషీద్ ఖాన్, నూర్ అహ్మద్, మహ్మద్ షమీ, మోమిత్ శర్మ, జోష్ లిటిల్.

2023-05-28T03:46:51Z dg43tfdfdgfd