CA GOLD MEDALIST: బెంగళూరు తొక్కిసలాటలో సీఏ గోల్డ్ మెడలిస్ట్ మృతి.. కిందపడిన భర్త పైకి లేచేలోపే.. ఊహించని దారుణం!
CA Gold Medalist Died : సుదీర్ఘ నిరీక్షణకు తెరదించుతూ ఆర్సీబీ తొలిసారి ఐపీఎల్ ట్రోఫీ గెలవడంతో బుధవారం (జూన్ 4) బెంగళూరులో పండగ వాతావరణం నెలకొంది. బుధవారం సాయంత్రం చిన్నస్వామి స్టేడియం వెలుపల వేలాది మంది జనసందోహం, అభిమానుల ఆనందోత్సవాలు, నినాదాలతో కోలాహలంగా కనిపించింది. క్రికెట్ అభిమానులకు, ముఖ్యంగా రాయల్ ఛాలెంజర్స్ బెంగళూరు (RCB) అభిమానులకు ఇది కల నిజమైన రోజు.
ఈ ఉత్సాహంలోనే అక్షత, ఆశయ్ అనే దంపతులు స్టేడియంలో జరిగే కార్యక్రమానికి హాజరై తమ అభిమాన క్రికెటర్లను చూద్దామని ఆశించారు. అయితే వారి ఆనందం అంతలోనే ఆవిరైపోయింది. స్టేడియం లోపలికి వెళ్తున్న క్రమంలో జరిగిన తొక్కిసలాటలో అక్షత ప్రాణాలు కోల్పోయారు. దీంతో ఆ కుటంబంలో తీవ్ర విషాదం నెలకొంది.
చెదిరిన మధుర జ్ఞాపకాలు..
ఉత్తర కన్నడ జిల్లాకు చెందిన అక్షత పాయ్, ఆశయ్ అంబాలి.. ఇద్దరూ చిన్నప్పటి నుంచి క్రికెట్ అభిమానులు. అందులోనూ ఆర్సీబీ అంటే వారికి అమితమైన అభిమానం. విరాట్ కోహ్లి వారికి ఆరాధ్య క్రికెటర్. ఏడాదిన్నర క్రితం ప్రేమించి పెళ్లి చేసుకున్న ఈ దంపతులు.. జీవితాంతం ఒకరికొకు తోడుగా ఉంటామని ఎన్నో కలలు కన్నారు. అక్షత చదువులో ఎప్పుడూ ముందుండేవారు. చార్టెడ్ అకౌంటెన్సీ (CA) పరీక్షల్లో గోల్డ్ మెడల్ సాధించి తన కుటుంబం మొత్తం గర్వపడేలా చేశారామె. వారిద్దరూ ఎప్పుడూ ఒకరికొకరు అండగా నిలిచేవాళ్లు.హాఫ్ డే సెలవు పెట్టి మరీ..
ఆర్సీబీ గెలిచిందని తెలిసి వారి ఆనందానికి అవధులు లేకుండా పోయాయి. స్టేడియానికి వెళ్లడానికి అక్షత, అక్షయ్ హాఫ్ డే సెలవు పెట్టారు. ఇద్దరూ చిన్నస్వామి స్టేడియం వైపు అడుగులేస్తూ, వారి భవిష్యత్తు గురించి ఎన్నో కలలు కన్నారు. కానీ, అకస్మాత్తుగా జరిగిన తొక్కిసలాట వారి ఆనందాన్ని, కలలను చెదరగొట్టింది. కిందపడిపోయిన ఆశయ్‌ను కొందరు పైకి లేపే లోపే.. అక్షత కనిపించకుండా పోయింది. ఆ తర్వాత హాస్పిటల్ బెడ్ మీద ఆమెను విగత జీవిగా చూడాల్సి వచ్చింది. తన భార్యను అచేతనంగ ఉండటం చూసి ఆశయ్ గుండె ముక్కలైంది. అక్షత ప్రాణాలు కోల్పోవడంతో అక్షయ్ జీవితంలో చీకటి అలుముకుంది.స్టేడియం వద్ద ఏం జరిగిందో ఆశయ్ వివరించారు. "17వ నంబర్ గేటు నుంచి అక్షత, నేను స్టేడియంలోకి వెళ్తున్నాము. అక్కడ భారీగా జనాలు ఉన్నారు. ఈ క్రమంలో చేయి పట్టు తప్పి నేను కింద పడ్డాను. కొందరు వ్యక్తులు నన్ను పైకి లేపారు. అయితే అక్కడ అక్షత కనిపించలేదు. ఆమెను వెతుక్కుంటూ అటూ ఇటూ తిరిగాను. పోలీసులను అడిగాను. ఇంతలో ఓ యువకుడు ఆర్సీబీ జెర్సీ ధరించిన ఓ మహిళను ఎత్తుకొని తీసుకువెళ్తున్న వీడియో చూపించాడు. దీంతో నేను పలు ఆస్పత్రులు వెతికాను. చివరికి బౌరింగ్ ఆస్పత్రిలో ఆమెను విగత జీవిగా చూశాను" అంటూ ఆశయ్ కన్నీటి పర్యంతమయ్యారు. ఈ తొక్కిసలాట ఘటనపై పోలీసులు ఎఫ్‌ఐఆర్ నమోదు చేసిన సంగతి తెలిసిందే.
