AHMEDABAD WEATHER: ఇవాళ కూడా ఫైనల్ జరగకపోతే.. విజేతగా గుజరాత్ టైటాన్స్!

అహ్మదాబాద్‌లో వర్షం కురవడంతో.. ఆదివారం రాత్రి జరగాల్సిన ఐపీఎల్ ఫైనల్ మ్యాచ్ మరుసటి రోజుకి వాయిదా పడింది. ఐపీఎల్ చరిత్రలో ఇలా జరగడం ఇదే తొలిసారి కావడం గమనార్హం. గుజరాత్ టైటాన్స్ హెచ్ కోచ్‌ ఆశిష్ నెహ్రా, చెన్నై సూపర్ కింగ్స్ హెచ్ కోచ్ స్టీఫెన్ ఫ్లేమింగ్‌తో సంప్రదింపులు జరిపిన అనంతరం మ్యాచ్ అధికారులు వాయిదా నిర్ణయం తీసుకున్నారు. అంతకు ముందే మైదానంలోని పరిస్థితిపై గ్రౌండ్స్‌మెన్‌తో అధికారులు సంప్రదింపులు జరిపారు.

ఆదివారం ఫైనల్ మ్యాచ్ చూడటం కోసం టికెట్లు కొనుగోలు చేసిన వారిని సోమవారం కూడా స్టేడియంలోకి అనుమతిస్తారు. అయితే సోమవారం కూడా అహ్మదాబాద్‌లో వర్షం కురిసే అవకాశం ఉందని వాతావరణ శాఖ చెబుతోంది. సోమవారం కూడా వర్షం ఇలాగే కురిసి మ్యాచ్ నిర్వహణ సాధ్యం కాకపోతే.. గుజరాత్ టైటాన్స్‌ను విజేతగా ప్రకటిస్తారు. లీగ్ దశలో ఆ జట్టు పాయింట్ల పట్టికలో అగ్రస్థానంలో నిలవడమే దీనికి కారణం.

సోమవారం సాయంత్రం అహ్మదాబాద్‌లో వాతావరణం మేఘావృతమై ఉంటుందని, గంటకు 10-15 కిలోమీటర్ల వేగంతో ఈదురు గాలులు వీస్తాయని వెదర్.కామ్ తెలిపింది. కానీ రాత్రి ఫైనల్ మ్యాచ్‌ సజావుగా సాగే అవకాశాలు ఉన్నాయంటూ గుడ్ న్యూస్ చెప్పింది.

అహ్మదాబాద్‌లో పగటి పూట ఉష్ణోగ్రతలు 42 డిగ్రీల సెల్సియస్‌గా నమోదవుతాయని.. కానీ ఉరుములు మెరుపులతో కూడిన వర్షం పడే అవకాశం ఉందని అహ్మదాబాద్‌లోని భారత వాతావరణ కేంద్ర విభాగం శనివారం అంచనా వేసింది. ఐఎండీ అంచనాలను నిజం చేస్తూ.. ఆదివారం సాయంత్రం అహ్మదాబాద్‌లో భారీ వర్షం కురిసింది. ఆదివారం సాయంత్రం 6 గంటల నుంచి రాత్రి 8 గంటల మధ్య అహ్మదాబాద్‌లో 41 మిల్లీమీటర్ల వర్షపాతం నమోదైందని గాంధీ నగర్‌లోని స్టేట్ ఎమర్జెన్సీ ఆపరేషన్ సెంటర్ వెల్లడించింది.

ఒకవేళ సోమవారం కూడా మ్యాచ్‌కు వర్షం ఆటంకం కలిగిస్తే..

* మ్యాచ్ రాత్రి 9.40 గంటల లోపు ప్రారంభమైతే పూర్తి మ్యాచ్ నిర్వహణ సాధ్యపడుతుంది. ఆ తర్వాత ఆలస్యం జరిగిన కొద్దీ ఓవర్లను కుదిస్తారు.

* 9.45కి మ్యాచ్ రీషెడ్యూల్ అయితే 19 ఓవర్లు, 10 గంటలకు రీషెడ్యూల్ అయితే 17 ఓవర్లు, 10.30 గంటలకు రీషెడ్యూల్ అయితే 15 ఓవర్ల ఆట సాధ్యపడుతుంది.

* అర్ధరాత్రి 12 గంటల 6 నిమిషాలు కటాఫ్ టైం. అప్పటిలోగా పరిస్థితులు అనుకూలిస్తే.. ఐదు ఓవర్ల మ్యాచ్‌ను నిర్వహిస్తారు. అది కూడా సాధ్యం కాకపోతే సూపర్ ఓవర్ నిర్వహిస్తారు. ఇందుకోసం ఔట్ ఫీల్డ్ అర్ధరాత్రి 1.20లోగా రెడీ కావాల్సి ఉంటుంది.

* ఒక వేళ సూపర్ ఓవర్ కూడా జరగకపోతే.. లీగ్ దశలో 20 పాయింట్లతో పాయింట్ల పట్టికలో అగ్రస్థానంలో ఉన్న గుజరాత్ టైటాన్స్‌ను విజేతగా ప్రకటిస్తారు. లీగ్ దశలో చెన్నై సూపర్ కింగ్స్ ఖాతాలో 17 పాయింట్లే ఉన్న సంగతి తెలిసిందే.

2023-05-29T04:47:11Z dg43tfdfdgfd