స్నేహితురాలిని పెళ్లాడిన అక్షర్ పటేల్.. క్రికెటర్ కంటే అతడి భార్య ఏజ్‌లో అంత పెద్దదా?
భారత క్రికెటర్ అక్షర్ పటేల్ ఓ ఇంటివాడయ్యాడు. గురువారం వడోదరలో మేహా పటేల్‌ను పెళ్లాడాడు. వివాహం కోసమే అక్షర్ పటేల్ న్యూజిలాండ్‌తో వన్డే సిరీస్‌కు దూరమయ్యాడు. తన పెళ్లికి సంబంధించి ఫొటోలు, వీడియోలను అక్షర్ పటేల్ షేర్ చేయలేదు. కానీ అతడి ఫ్యాన్స్ మాత్రం ట్విట్టర్లో ఫొటోలు, వీడియోలను షేర్ చేశారు. మేహా డైటిషియన్, న్యూట్రియనిస్టుగా పని చేస్తున్నారు. డీటీ మేహా పేరిట ఓ సొంతంగా వెంచర్ ప్రారంభించారు.
అక్షర్, మేహా చాలా కాలంగా స్నేహితులు.. ఆ తర్వాత వారిద్దరూ ప్రేమలో పడ్డారు. 2022 జనవరి 20న అక్షర్ పటేల్ పుట్టిన రోజున వీరిద్దరి ఎంగేజ్‌మెంట్ జరిగింది. నిశ్చితార్ధానికి సంబంధించిన ఫొటోలను అక్షర్ సోషల్ మీడియాలో పోస్టు చేశాడు. మేహా పటేల్ విషయానికి వస్తే.. ఆమె సోషల్ మీడియాలో యాక్టివ్‌గా ఉంటారు. ఆమెకు ఇన్‌స్టాగ్రామ్‌లో రీల్స్ పోస్ట్ చేయడమంటే ఇష్టం. ఆమె తన చేతిపై ‘Aksh’ అనే అక్షరాలను టాటూ వేయించుకున్నారు.
ఇక అక్షర్ పటేల్ విషయానికి వస్తే.. శ్రీలంకతో ముగిసిన టీ20, వన్డే సిరీస్‌లలో అక్షర్ అద్భుతంగా రాణించాడు. శ్రీలంకతో జరిగిన రెండో టీ20లో సూర్య కంటే బాగా ఆడిన అక్షర్.. 31 బంతుల్లో 65 పరుగులు చేసి జట్టును గెలిపించే ప్రయత్నం చేశాడు.
సంగీత్ ఫంక్షన్లో అక్షర్, మేహా దంపతులు డ్యాన్స్ చేయగా.. బంతిని బ్యాట్‌తో కొట్టినట్టు.. తర్వాత క్యాచ్ అందుకున్నట్లు అక్షర్ స్టెప్పులేయడం గమనార్హం. అక్షర్ పటేల్ దంపతులకు క్రికెట్ అభిమానులు శుభాకాంక్షలు చెబుతున్నారు. క్రికెటర్లు జయదేవ్ ఉనద్కత్, మహ్మద్ కైఫ్ తదితరులు వీరి పెళ్లి వేడుకకు హాజరయ్యారు.
టీమిండియా క్రికెటర్ కేఎల్ రాహుల్ సైతం ఇటీవలే తన గర్ల్ ఫ్రెండ్ అతియా శెట్టిని పెళ్లాడిన సంగతి తెలిసిందే. రాహుల్-అతియా మహారాష్ట్రలోని ఖండాలాలో అతికొద్ది మంది బంధు మిత్రుల సమక్షంలో ఒక్కటయ్యారు. వీరి వెడ్డింగ్ రిసెప్షన్ ఐపీఎల్ ముగిశాక జరగనుంది. అక్షర్ దంపతులు పెళ్లి రిసెప్షన్ కూడా జూన్‌లోనే జరిగే అవకాశం ఉంది.
ఫిబ్రవరి 9న ఆస్ట్రేలియాతో ప్రారంభం కానున్న నాలుగు టెస్టుల సిరీస్ కోసం ఎంపిక చేసిన ఆటగాళ్ల జాబితాలో రాహుల్, అక్షర్ పటేల్ సైతం ఉన్నారు. దీంతో ఈ ఇద్దరు క్రికెటర్లు ఫిబ్రవరి తొలి వారంలో జట్టుతో కలిసే అవకాశం ఉంది.
మేహా పటేల్ పేరిట ఈ ఏడాది జవనరిలో క్రియేట్ చేసిన ట్విట్టర్ ఖాతాలో పెళ్లికి సంబంధించి ఫొటోలు, వీడియోలను పోస్టు చేశారు. కాగా అందులో పేర్కొన్న వివరాల ప్రకారం మేహా 1987 జూన్ 24 జన్మించారు. అక్షర్ పటేల్ 1994 జూన్ 20న జన్మించాడు.
2023-01-27T07:09:37Z dg43tfdfdgfd
