వెస్టిండీస్ పేస్ దెబ్బ.. ఆస్ట్రేలియా అబ్బా! మొదటిరోజే ఆసీస్ ఆలౌట్!!

వెస్డిండీస్ బౌలర్ల ధాటికి ఆస్ట్రేలియా బ్యాటర్లు ఖంగుతింటున్నారు. వరల్డ్ బెస్ట్ బ్యాటర్లు ఉన్న ఆసీస్ విండీస్ పేస్ ధాటికి ఒక్కరోజు కూడా క్రీజులో నిలవలేకపోయింది. గ్రెనడా వేదికగా జరుగుతున్న రెండో టెస్టు మొదటి రోజే ఆస్ట్రేలియా ఆలౌట్ అయింది. వెస్టిండీస్ పేస్ బౌలర్లు తమ సత్తా చాటి ఆసీస్‌కు కంగారు పెట్టిస్తున్నారు.

గ్రెనడా వేదికగా జరుగుతున్న వెస్టిండీస్ - ఆస్ట్రేలియా రెండో టెస్టులో టాస్ గెలిచిన ప్యాట్ కమిన్స్ బ్యాటింగ్ ఎంచుకున్నాడు. ఓపెనర్లు సామ్ కోన్‌స్టాస్, ఉస్మాన్ ఖ్వాజా తొలి వికెట్‌కు 47 పరుగులు జోడించారు. అయితే వీరిద్దరూ వెంటవెంటనే అవుటవ్వడంతో ఆస్ట్రేలియా పతనం మొదలైంది. 110 పరుగులకే ఐదు వికెట్లు కోల్పోయిన ఆసీస్‌ను మిడిలార్డర్ బ్యాటర్లు కాపాడారు.

సామ్ కోన్‌స్టాస్ 25, ఉస్వాన్ ఖ్వాజా 16 పరుగులు చేసి 11, 12వ ఓవర్లలో అవుటవ్వగా.. కేవలం మూడు పరుగులే చేసిన స్టీవ్ స్మిత్ మూడో వికెట్‌కు పెవిలియన్ బాట పట్టాడు. కామెరూన్ గ్రీన్ 26, ట్రావిస్ హెడ్ 29 పరుగులే చేసి వెంటవెంటనే అవుటయ్యారు.

110 పరుగులకే ఐదు వికెట్లు కోల్పోయిన ఆస్ట్రేలియా జట్టును మిడిలార్డర్ బ్యాటర్లు బ్యూ వెబ్‌స్టర్, అలెక్స్ క్యారీ ఆదుకున్నారు. 81 బంతుల్లో పది ఫోర్లు, ఒక సిక్సర్‌తో 63 పరుగులు చేసిన అలెక్స్ క్యారీ 226 పరుగుల వద్ద ఆరో వికెట్‌గా అవుటయ్యాడు. ప్యాట్ కమిన్స్ 17, మిచెల్ స్టార్క్ 6 పరుగులు చేసి ఆ తర్వాత వికెట్లు కోల్పోయారు. 60 పరుగులు చేసిన బ్యూ వెబ్‌స్టర్ అన్ లక్కీగా రనౌట్ అయ్యాడు. దాంతో ఆస్ట్రేలియా జట్టు 286 పరుగులకు ఆలౌట్ అయింది.

వెస్టిండీస్ బౌలర్లలో అల్జరీ జోసఫ్ నాలుగు వికెట్లు తీసుకున్నాడు. ఫస్ట్ టెస్టులో ఐదు వికెట్లు తీసిన జేడన్ సీల్స్ రెండు వికెట్లు పడగొట్టగా, షమారీ జోసఫ్ ఒక వికెట్ దక్కించుకున్నాడు. అండర్సన్ ఫిలిప్, జస్టిన్ గ్రీవ్స్ చెరొక వికెట్ తీసుకున్నారు. వెస్టిండీస్ వేదికగా జరుగుతున్న మూడు టెస్టుల సిరీస్‌లో ఆస్ట్రేలియా మొదటి టెస్టులో గెలిచి 0-1తో లీడింగ్‌లో ఉంది.

2025-07-04T10:37:56Z