లేడీ అంపైర్‌తో మైదానంలోనే అశ్విన్ గొడవ.. గ్లౌవ్స్ విసిరేసి, బ్యాట్‌తో కొట్టి..!

తమిళనాడు ప్రీమియర్‌ లీగ్‌ 2025లో టీమిండియా మాజీ స్పిన్నర్ రవిచంద్రన్ అశ్విన్ సహనం కోల్పోయాడు. ఓ మ్యాచ్ సందర్బంగా తనను ఎల్బీడబ్ల్యూగా ప్రకటించినందుకు ఓ మహిళా అంపైర్‌తో వాగ్వాదానికి దిగాడు. ఇందుకు సంబంధించిన దృశ్యాలు సోషల్ మీడియాలో వైరల్‌గా మారాయి. ఇది చూసిన నెటిజన్లు అశ్విన్ స్థాయికి ఇది తగదని కామెంట్లు చేస్తున్నారు.

అసలేం జరిగిందంటే..

తమిళనాడు ప్రీమియర్‌ లీగ్‌ 2025 సీజన్‌లో రవిచంద్రన్ అశ్విన్‌ దిండుగల్‌ డ్రాగన్స్‌ జట్టుకు కెప్టెన్‌గా వ్యవహరిస్తున్నాడు. ఇందులో భాగంగా ఆదివారం దిండుగల్‌ డ్రాగన్స్‌, ఐడ్రీమ్‌ తిరుప్పుర్‌ మధ్య మ్యాచ్‌ జరిగింది. ఈ మ్యాచ్‌లో అశ్విన్‌ ఓపెనర్‌గా క్రీజులోకి వచ్చాడు. అయితే ప్రత్యర్థి బౌలర్‌ సాయి కిషోర్‌ వేసిన ఇన్నింగ్స్‌ ఐదో ఓవర్‌ చివరి బంతికి అశ్విన్‌ స్వీప్‌ షాట్‌ ఆడబోయి మిస్‌ అయ్యాడు. బంతి వెళ్లి వికెట్ల ముందు అశ్విన్‌ ప్యాడ్లకు తాకింది. దీంతో బౌలర్ సహా.. ఇతర ప్లేయర్లు ఎల్బీడబ్ల్యూకు అప్పీల్‌ చేశారు.

ఆన్‌ఫీల్డ్‌లో ఉన్న మహిళా అంపైర్‌ రవిచంద్రన్ అశ్విన్ ఔట్ అయినట్లు ప్రకటించారు. ఇదే అశ్విన్ కోపానికి కారణమైంది. ఔట్ అని ప్రకటించిన తర్వాత అశ్విన్.. ఆ అంపైర్‌కు ఏదో చెప్పబోయాడు. అయితే సదరు అంపైర్‌ మాత్రం అతడిని పట్టించుకోకుండా ముందుకు వెళ్లారు. దీంతో అశ్విన్ తీవ్ర ఆగ్రహం వ్యక్తం చేశాడు. బంతి ఔట్‌సైడ్ పిచ్ అయిందని వాదించే ప్రయత్నం చేశాడు. అప్పటికే రెండు రివ్యూలను కోల్పోవడంతో అంపైర్ నిర్ణయంపై థర్డ్ అంపైర్‌ రివ్యూకు వెళ్లలేకపోయాడు. గట్టిగా అరుస్తూ పెవిలియన్ వైపు నడిచాడు. బౌండరీ లైన్ దాటుతుండగా చేతి గ్లౌజ్స్‌ను తీసి దూరంగా విసిరేశాడు. బ్యాట్‌ను బలంగా ప్యాడ్స్‌పై కొట్టాడు.

ఈ మ్యాచ్‌లో రవిచంద్రన్ అశ్విన్ 11 బంతుల్లో 18 పరుగులు చేశాడు. ఇందులో 2 ఫోర్లు, సిక్సర్ ఉంది. ఈ మ్యాచ్‌లో అశ్విన్ జట్టు 16.2 ఓవర్లలో 93 పరుగులకు ఆలౌటైంది. అనంతరం స్వల్ప ఛేదనకు దిగిన తిరుప్పుర్‌ టీమ్.. 11.5 ఓవర్లలో వికెట్‌ మాత్రమే కోల్పోయి విజయం సాధించింది.

2025-06-09T10:40:38Z