చూసుకోవాలి కదా బ్రో.. రన్ తీస్తుండగా బ్యాటర్ జేబులో నుంచి పడిపోయిన ఫోన్..!

ఇంగ్లాండ్ వేదికగా జరుగుతున్న కౌంటీ ఛాంపియన్ షిప్‌లో లంకాషైర్, గ్లౌసెస్టర్‌షైర్ జట్ల మధ్య జరిగిన మ్యాచ్‌లో ఓ ఫన్నీ ఘటన జరిగింది. ఈ రెండు జట్ల మధ్య జరిగిన ఈ మ్యాచ్ సమయంలో లంకాషైర్ బ్యాటర్ టామ్ బెయిలీ జేబులో మొబైల్ ఫోన్ పెట్టుకుని మరీ క్రీజులోకి వచ్చాడు. అయితే పరుగు కోసం వికెట్ల మధ్య పరుగెడుతుండగా ఫోన్ కింద పడిపోవడంతో ఈ విషయం వెలుగులోకి వచ్చింది. ఇందుకు సంబంధించిన వీడియో సోషల్ మీడియాలో వైరల్‌గా మారింది.

అసలేం జరిగిందంటే..

కౌంటీ ఛాంపియన్ షిప్‌లో భాగంగా లంకాషైర్, గ్లౌసెస్టర్‌షైర్ జట్ల మధ్య మ్యాచ్ జరుగుతోంది. ఈ మ్యాచులో లంకాషైర్ ఇన్నింగ్స్‌లో పదో స్థానంలో బ్యాటింగ్‌కు వచ్చాడు టామ్ బెయిలీ. 114వ ఓవర్‌లో అతడు బ్యాటింగ్ చేస్తుండగా.. బంతిని లెగ్ సైడ్ ఆడాడు. ఆ తర్వాత 2 రన్స్ తీసేందుకు పరుగెత్తాడు. అయితే ఒక రన్ పూర్తి చేసి అతడు నాన్ స్ట్రైకింగ్‌ ఎండ్‌కు చేరుకుని రెండో పరుగు కోసం మళ్లీ స్ట్రైకింగ్ ఎండ్ వైపు పరుగెడుతుండగా అతడి జేబులో నుంచి ఏదో వస్తువు కిందపడిపోయింది.ఇందుకు సంబంధించిన దృశ్యాలను కెమెరామెన్ రికార్డు చేశాడు. అయితే అతడు జేబులో నుంచి పడ్డ వస్తువును మొబైల్ ఫోన్‌గా గుర్తించారు. ఆ తర్వాత అక్కడే ఉన్న ఫీల్డింగ్ టీమ్‌లోని సభ్యుడు.. ఫోన్‌ను తిరిగి బ్యాటర్‌కు ఇచ్చేశాడు. ఈ వీడియో నెట్టింట చక్కర్లు కొడుతోంది. కాగా టామ్ బెయిలీ కొన్నేళ్లుగా లంకాషైర్ జట్టు తరఫున ఆడుతున్నాడు. 34 ఏళ్ల బెయిలీ తన ఫస్ట్ క్లాస్ కెరీర్‌లో 392 వికెట్లు తీశాడు. కాగా రెండో రోజు ఆట మగిసే సమయానికి బెయిలీ.. 31 బంతుల్లో 22 రన్స్ చేసి నాటౌట్‌గా నిలిచాడు.ఈ వీడియోను చూసిన పలువురు సదరు బ్యాటర్‌కు ప్రశ్నలు సంధిస్తున్నారు. అసలు ఓ క్రికెట్ మ్యాచులో బ్యాటర్ క్రీజులోకి ఫోన్ తీసుకురావచ్చా? అతడు అంపైర్లకు చెప్పే ఇదంతా చేశాడా? అని ప్రశ్నిస్తున్నారు. అయితే రూల్స్ ప్రకారం, ఆటగాడు క్రికెట్ మ్యాచ్ సమయంలో కమ్యూనికేషన్ కోసం ఉపయోగించే ఏ గాడ్జెట్‌ను తనతో తీసుకెళ్లకూడదు. మ్యాచుకు ముందు ఆటగాళ్లు తమ ఫోన్లను సెక్యూరిటీకి అప్పగిస్తారు. మ్యాచ్ తర్వాతే వారి చేతికి ఫోన్‌లు వెళతాయి. మరి బెయిలీపై చర్యలు తీసుకుంటారా?లేదా అన్నది తేలాల్సి ఉంది.

2025-05-05T11:24:15Z