చివరి వన్డే ప్రపంచకప్ ఆడేశారా?.. లిస్ట్‌లో ఉంది వీళ్లేనా!
భారత్ వేదికగా జరిగిన మెగా ప్రపంచకప్ ముగిసింది. తొలి మ్యాచ్ నుంచి ఆదివారం జరిగిన ఫైనల్ మ్యాచు వరకు ఎన్నో పోరాటాలు, ఎన్నో ఉత్కంఠ మ్యాచులు క్రీడాభిమానులను ఉర్రూతలూగించాయి. తమ అభిమాన ఆటగాళ్లను చూసేందుకు క్రికెట్ ఫ్యాన్స్ దేశ విదేశాల నుంచి తరలివచ్చారు. దీంతో మ్యాచులు జరిగే స్టేడియాలన్నీ దాదాపుగా నిండిపోయాయి. ఇక 12 ఏళ్ల విరామం తర్వాత భారత్ కప్పు కైవసం చేసుకుంటుందని ఆశించిన భారత్ అభిమానులకు నిరాశ ఎదురైంది. చివరి మెట్టుపై బోల్తాపడిన టీమిండియా.. మరోసారి ఖాళీ చేతులతో వెనుదిరిగింది.
ఫైనల్‌లో భారత్ ఓడిపోవడంపై ఆటగాళ్లు ఒకింత భావోద్వేగానికి లోనయ్యారు. ముఖ్యంగా విరాట్ కోహ్లీ, రోహిత్ శర్మ, మహమ్మద్ షమీ లాంటి ప్లేయర్లు అద్భుత ఫామ్‌లో ఉన్నప్పటికీ ట్రోఫీని దక్కించుకోకపోవడాన్ని అభిమానులు జీర్ణించుకోలేకపోతున్నారు. ఇక వారిని మరో వరల్డ్ కప్‌లో చూడలేమా? వారంతా చివరి టోర్నీ ఆడేశారా? అనే ప్రశ్నలు ఇప్పుడు తలెత్తుతున్నాయి. ఈ నేపథ్యంలో భారత ప్లేయర్లు అనే కాకుండా.. మిగతా జట్లలోనూ వయసు మీద పడే ఆటగాళ్ల మరో ప్రపంచకప్‌లో కనిపించకపోవచ్చు. ఆ ఆటగాళ్లేవరు ఓ లుక్కేద్దాం..
రోహిత్ శర్మ..
వన్డే ప్రపంచకప్ 2023లో టీమిండియా ఫైనల్ చేరిందంటే అందులో రోహిత్ శర్మ పాత్ర కీలకం. ఐపీఎల్‌లో ముంబయి ఇండియన్స్ జట్టును విజయవంతంగా నడిపిస్తూ ట్రోఫీలు కొల్లగొట్టిన రోహిత్.. ఈ టోర్నీలోనూ తన నాయకత్వ పటిమను ప్రదర్శించాడు. ఒత్తిడి సమయాల్లోనూ మంచి నిర్ణయాలు తీసుకుంటూ జట్టును నడిపించాడు. బ్యాటర్‌గాను అద్భుత ఫామ్‌ను కొనసాగించాడు. రోహిత్‌కు ఇప్పుడు 36 ఏళ్లు. 2027 వరల్డ్ కప్ నాటికి అతడికి 40 ఏళ్లు వస్తాయి. ఆ ఏజ్‌లో అతడు టోర్నీ ఆడటం కష్టమే.
మహమ్మద్ షమీ..
టోర్నీలో 7 మ్యాచుల్లోనే 24 వికెట్లు పడగొట్టి ఔరా అనిపించాడు షమీ. ప్రస్తుతం 33 ఏళ్ల వయస్సులో ఉన్న షమీ.. నాలుగేళ్ల నాటికి అంటే 37 ఏళ్ల వయసులో మరో టోర్నీ ఆడటం కష్టమే. బౌలర్లు, ముఖ్యంగా పేసర్లు 37 ఏళ్ల వయసులో ఫిట్‌నెస్ కాపాడుకోవడం అంటే దాదాపుగా కష్టం.
37 ఏళ్ల యవసులో ఉన్న రవిచంద్రన్ అశ్విన్‌కు ఇదే చివరి ప్రపంచకప్! అతడిని మళ్లీ ప్రపంచకప్‌లో ఇక చూడకపోవచ్చు. జడేజాకు వయసు ప్రస్తుతం 34 ఏళ్లు కాగా.. 38 ఏళ్ల వయసులో ప్రపంచకప్ ఆడతాడా అంటే అనుమానమే. ఫిట్‌నెస్‌ను కాపాడుకుంటూ.. 38 ఏళ్ల వయసులో మంచి ప్రదర్శన చేయడం కష్టమే.
ఇక విరాట్ కోహ్లీ వయసు 35 ఏళ్లు. ఫిట్‌నెస్ విషయంలో మేటి అయిన కోహ్లీకి వచ్చే వరల్డ్ కప్ నాటికి 39 ఏళ్లు వస్తాయి. కోహ్లీ ఫిట్‌నెస్ లెవెల్స్, ఫామ్‌ను బట్టి చూస్తే.. మరో 2-3 ఏళ్లు ఈజీగా ఆడేయచ్చు. కోహ్లీ గనక 2027 వన్డే ప్రపంచకప్ ఆడాలి అని అనుకుంటే కచ్చితంగా ఆడే అవకాశం ఉంది.
ఈ టోర్నీ కోసమే రిటైర్మెంట్ నిర్ణయాన్ని వెనక్కి తీసుకుని వచ్చిన ఇంగ్లాండ్ ఆల్ రౌండర్ బెన్ స్టోక్స్.. ఇక మళ్లీ వన్డేల్లో కనిపించకపోవచ్చు. ఆటగాళ్ల గాయంతో టోర్నీ మధ్యలో చోటు దక్కించుకున్న శ్రీలంక సీనియర్ ప్లేయర్ ఏంజేలో మాథ్యూస్ సైతం.. చివరి వరల్డ్ కప్ ఆడేశాడు. అఫ్ఘానిస్థాన్ ప్లేయర్ 38 ఏళ్ల నబీదీ ఇదే పరిస్థితి.
ఆస్ట్రేలియా ఆటగాళ్ల విషయంలో ఈ జాబితా ఎక్కువగా ఉంది. 37 ఏళ్ల వార్నర్‌కు ఇదే చివరి వన్డే ప్రపంచకప్. 35 ఏళ్ల మ్యాక్స్‌వెల్, 34 ఏళ్ల స్మిత్, 33 ఏళ్ల మిచెల్ స్టార్క్‌లు 2027 ప్రపంచకప్ ఆడేది అనుమానమే. 33 ఏళ్ల కేన్ విలియమ్సన్, 34 ఏళ్ల ట్రెంట్ బౌల్ట్‌లు కూడా వన్డే క్రికెట్‌లో నాలుగేళ్ల పాటు కొనసాగడం డౌటే. షకిబ్ అల్ హసన్ (36), ముష్పిఖర్ రహీమ్ (36), 33 ఏళ్ల పైబడిన టెంబా బవుమా, డేవిడ్ మిల్లర్, వాండర్ డసెన్‌ వంటి ఆటగాళ్లు సైతం మరో ప్రపంచకప్‌లో కనిపించకపోవచ్చు.
2023-11-20T04:13:16Z dg43tfdfdgfd