కోహ్లీ బలహీనతేంటో చెప్పిన బస్సు డ్రైవర్‌.. ఇలా చేస్తే ఔట్ అవుతాడని సూచన..!

టీమిండియా స్టార్ బ్యాటర్ విరాట్ కోహ్లీ.. గత కొన్ని రోజులుగా పేలవ ఫామ్‌తో బాధపడుతున్నాడు. స్వదేశంలో న్యూజిలాండ్‌తో టెస్టు సిరీస్‌తో పాటు ఆస్ట్రేలియాతో బోర్డర్ గవాస్కర్ ట్రోఫీలోనూ అతడు ఆశించిన మేర రాణించలేకపోయాడు. ముఖ్యంగా ఆస్ట్రేలియా గడ్డపై పదే పదే ఒకే తరహాలో ఔట్ అవుతూ ఫ్యాన్స్‌ను నిరాశపరిచాడు. 4, 5వ స్టంప్స్‌ మీదుగా వెళ్లే బంతులను వేటాడుతూ.. క్యాచ్ ఇవ్వడం అలవాటుగా మార్చుకున్నాడు. దీంతో చాలా మంది అతడి వీక్‌నెస్ అదేనని చెప్పుకొచ్చారు. అయితే భారత ఫ్యాన్స్ మాత్రం కోహ్లీ లాంటి ప్లేయర్.. తన బలహీనతను అధిగమిస్తాడని.. మళ్లీ పరుగుల వరద పారిస్తాడని ఆశిస్తున్నారు. ఈ నేపథ్యంలోనే ఇంగ్లాండ్‌తో వన్డే సిరీస్, ఛాంపియన్స్ ట్రోఫీకి ముందు కోహ్లీ.. రంజీ మ్యాచ్‌ ఆడాడు. అయితే ఈ మ్యాచ్‌లోనూ అతడు తొలి ఇన్నింగ్స్‌లో ఆరు పరుగులు మాత్రమే చేసి ఔట్ అయ్యాడు. ఢిల్లీ తరఫున ఆడిన కోహ్లీ.. రైల్వేస్ బౌలర్ హిమాన్షు సంఘ్వాన్ బౌలింగ్‌లో క్లీన్‌బౌల్డ్ అయ్యాడు. కోహ్లీని ఔట్ చేసిన తర్వాత హిమాన్షు సంఘ్వాన్ ఒక్కసారిగా వార్తల్లో నిలిచాడు. 12 ఏళ్ల తర్వాత రంజీ మ్యాచ్‌ ఆడిన కోహ్లీని.. పెవిలియన్ పంపించిన అతడు ఎవరా అని అంతటా చర్చించారు. అయితే మ్యాచ్ తర్వాత హిమాన్షు సంఘ్వాన్.. ఆసక్తికర వ్యాఖ్యలు చేశాడు. కోహ్లీని ఔట్ చేయడం, అతడితో మాట్లాడటం.. అతడి బలహీనతను గురించి ఇతరులు చెప్పడం వంటి విషయాలను పంచుకున్నాడు.“ఢిల్లీతో మ్యాచ్‌కు ముందు ఆ జట్టులో కోహ్లీ, పంత్‌లు ఆడుతున్నారని మాకు సమాచారం అందింది. కానీ ఆ మ్యాచ్‌లో పంత్ ఆడలేదు. ఆ మ్యాచ్ లైవ్‌ స్ట్రీమింగ్ అవుతుందనే విషయం కూడా నాకు తొలుత తెలియదు. ఈ మ్యాచ్‌కు ముందు మా బస్సు డ్రైవర్‌ ఓ సూచన చేశాడు. కోహ్లీకి 5వ స్టంప్‌లైన్‌లో బౌలింగ్‌ చేయాలని అతడు చెప్పాడు. బస్సు డ్రైవర్‌ చెప్పిన మాట విని నేను షాక్ అయ్యా. కానీ ఎదుటివారి బలహీనతలు కాకుండా నా బలాలపై మాత్రమే నేను ఫోకస్ చేస్తా. కోహ్లీ విషయంలోనూ అదే చేసి.. ఫలితం అందుకున్నా” అని సంఘ్వాన్ చెప్పుకొచ్చాడు.కోహ్లీని ఔట్ చేయడానికి ప్రత్యేకంగా ప్లాన్స్‌ ఏమీ చేయలేదని అతడు అన్నాడు. “మా ఇన్నింగ్స్ ముగిసిన తర్వాత డ్రెస్సింగ్‌ రూమ్‌కు వెళ్తున్నప్పుడు విరాట్‌తో మాట్లాడాను. బాగా బౌలింగ్ చేశావని కోహ్లీ మెచ్చుకున్నాడు. అతడిని ఔట్ చేసిన బంతి తీసుకొని ఢిల్లీ డ్రెస్సింగ్‌ రూమ్‌కి వెళ్లి విరాట్‌తో ఫొటో దిగా” అని హిమాన్షు సంఘ్వాన్ వ్యాఖ్యానించాడు.

2025-02-04T13:01:59Z