ఓపెనర్లిద్దరూ డకౌట్.. కాసేపట్లో ఉతికారేసిన ఉర్విల్! అప్పుడే అశ్విన్.. అసలేం జరిగిందీ!

కోల్‌కతా నైట్ రైడర్స్ - చెన్నై సూపర్ కింగ్స్ మ్యాచ్‌లో అసలేం జరిగిందో కాసేపు ఎవ్వరికీ అర్థం కాలేదు. ఈ మ్యాచ్‌లో టాస్ గెలిచిన కేకేఆర్ కెప్టెన్ అజింక్య రహానే తొలుత బ్యాటింగ్ ఎంచుకున్నాడు. హోం గ్రౌండ్ ఈడెన్‌లో భారీ స్కోర్ నమోదవుతుంది అనుకుంటే సీఎస్కే స్పిన్నర్ల ధాటికి కేకేఆర్ బ్యాటర్లు విఫలమయ్యారు. దాంతో కేకేఆర్ 20 ఓవర్లలో 179 పరుగులు మాత్రమే చేయగలిగింది. ఈజీ టార్గెట్‌తో బరిలోకి దిగిన చెన్నై సూపర్ కింగ్స్ జట్టు ఆరంభంలోనే వికెట్లు కోల్పోయింది. ఓపెనర్లు ఆయుష్ మాత్రే, దేవాన్ కాన్వే వరుస ఓవర్లలో పెవిలియన్ బాట పట్టారు. ఆర్సీబీపై 90కి పైగా పరుగులతో రాణించిన ఆయుష్ మాత్రే ఈ మ్యాచ్‌లో కేవలం రెండు బంతులే ఆడి డకౌట్‌గా వెనుదిరగగా.. చాలా రోజుల తర్వాత జట్టులోకి వచ్చిన దేవాన్ కాన్వే కూడా కేవలం రెండు బంతులే ఆడి మొయిన్ అలీ బౌలింగ్‌లో క్లీన్ బౌల్డ్ అయ్యాడు. ఈ మ్యాచ్‌తో ఐపీఎల్ డెబ్యూ ఇచ్చిన ఉర్విల్ పటేల్ మాత్రం ఎవ్వరికీ అంతుచిక్కని షాట్లతో అందర్నీ ఆశ్చర్యపరిచాడు. ఒకవైపు వికెట్లు పడుతుంటే మరోవైపు ఉర్విల్ మాత్రం బ్యాట్‌తో ఇరగదీశాడు. క్రీజులో ఉన్నంత సేపు కోల్‌కతా నైట్ రైడర్స్ బౌలర్లకు చుక్కలు చూయించాడు. 11 బంతులు ఆడిన ఉర్విల్ పటేల్ ఒక్క ఫోర్, నాలుగు సిక్సర్లతో 31 పరుగులు చేశాడు. కేవలం బౌండరీ ద్వారానే ఉర్విల్ 28 పరుగులు రాబట్టడం విశేషం. హర్షిత్ రాణా బౌలింగ్‌లో షాట్‌కి ప్రయత్నించి ఎడ్జ్ తీసుకుని థర్డ్ మ్యాన్‌లో ఉన్న వరుణ్ చక్రవర్తికి క్యాచ్ ఇచ్చి పెవిలియన్ బాట పట్టాడు. చెన్నై సూపర్ కింగ్స్ వెంటవెంటనే రెండు వికెట్లు కోల్పోవడంతో కెప్టెన్ ధోనీ రవిచంద్రన్ అశ్విన్‌ను ట్రంప్ కార్డ్‌గా నాలుగో స్థానంలో బ్యాటింగ్‌కి పంపాడు. వరుసగా రెండు వికెట్లు పడిన తర్వాత అశ్విన్ క్రీజులోకి రావడంతో ఎవ్వరికీ ఏం అర్థం కాలేదు. అశ్విన్ కూడా కేవలం ఏడు బంతులే ఆడి ఒక ఫోర్‌తో ఎనిమిది పరుగులు చేశాడు. రవీంద్ర జడేజా దూకుడుగా ఆడుతున్నట్టు కనిపించినా 10 బంతుల్లో రెండు ఫోర్లు, ఒక సిక్సర్‌తో 19 పరుగులు చేసి వరుణ్ చక్రవర్తి బౌలింగ్‌లో బౌల్డ్ అయ్యాడు. దాంతో పవర్ ప్లేలోనే చెన్నై సూపర్ కింగ్స్ జట్టు 62 పరుగులకు ఐదు వికెట్లు కోల్పోయింది.

2025-05-07T16:55:24Z