అల్లు అర్జున్‌ తరహాలోనే ‘విరాట్ కోహ్లి అరెస్ట్’..? న్యాయం కోసమా లేదా రాజకీయమా?

బెంగళూరులో ఆర్సీబీ విజయోత్సవ వేడుకల సందర్భంగా జరిగిన తొక్కిసలాటలో 11 మంది మరణించిన ఘటన దేశ ప్రజలను విస్మయానికి గురి చేసింది. ఈ సంఘటనకు సంబంధించి పోలీసులు ఇప్పటికే కొందర్ని అరెస్ట్ చేశారు. అయినా సరే సోషల్ మీడియాలో మాత్రం అరెస్ట్ కోహ్లి అనే హ్యాష్ ట్యాగ్ ట్రెండ్ అవుతోంది. ఈ ఘటన తర్వాత విరాట్ కోహ్లి లండన్ వెళ్లిపోయాంటూ తప్పుడు ప్రచారం చేస్తున్నారు. గతంలో అల్లు అర్జున్‌ను అరెస్ట్ చేసినట్లే.. విరాట్ కోహ్లీని కూడా అరెస్ట్ చేయాలని కొందరు డిమాండ్ చేస్తున్నారు. ఈ డిమాండ్ వెనుక ఉన్న లాజిక్ ఏంటి..? ఇది సరైందేనా..? లేదా రాజకీయం చేస్తున్నారా అనేది ఇప్పుడు చూద్దాం..

అల్లు అర్జున్ కేసు vs విరాట్ కోహ్లీ కేసు

2024న డిసెంబర్‌లో పుష్ప 2 ప్రీమియర్ సమయంలో హైదరాబాద్‌లోని సంధ్య థియేటర్ వద్ద జరిగిన తొక్కిసలాటలో ఒక మహిళ చనిపోగా, ఆమె కుమారుడు తీవ్రంగా గాయపడ్డాడు. ఈ కేసులో పోలీసులు అల్లు అర్జున్‌ను అరెస్ట్ చేయగా.. కోర్టు బెయిల్ మంజూరు చేసింది. అదే విధంగా, బెంగళూరులో ఆర్సీబీ విజయోత్సవ వేడుకల సందర్భంగా జరిగిన తొక్కిసలాటలో 11 మంది చనిపోయారు. ఇక్కడ ఈవెంట్‌ను నిర్వహించిన ఆర్సీబీ మేనేజ్‌మెంట్, స్థానిక అధికారుల తప్పిదం కారణంగా భద్రతా ఏర్పాట్లలో లోపాలు చోటు చేసుకున్నాయి. కానీ, విరాట్ కోహ్లీకి ఈ ఘటనలో నేరుగా బాధ్యత లేదు. అయినప్పటికీ, ‘అల్లు అర్జున్‌ను అరెస్ట్ చేసినప్పుడు.. కోహ్లీని ఎందుకు అరెస్ట్ చేయకూడదు?’ అనే ప్రశ్నలు వినిపిస్తున్నాయి.

న్యాయం కోసమా లేదా రాజకీయమా?

"విరాట్ కోహ్లీ ఈ ఘటనకు కారణం కాదు. అతను ఒక క్రికెటర్, ఈవెంట్ నిర్వాహకుడు కాదు. భద్రతా వ్యవస్థలో లోపాలకు పోలీసులు, అధికారులు బాధ్యత వహించాలి." అని ఆర్సీబీ అభిమానులు చెబుతున్నారు. ఈ ఘటన తనను తీవ్రంగా కలచివేసిందంటూ విరాట్ స్పందించిన విషయాన్ని కూడా వారు గుర్తు చేస్తున్నారు. ఆ మాటకొస్తే తొక్కిసలాటలో ప్రాణ నష్టం వాటిల్లిన విషయం కోహ్లికి వెంటనే తెలియదంటున్నారు.

కానీ కొందరు మాత్రం డబుల్ స్టాండర్డ్ ఎందుకు? అని ప్రశ్నిస్తున్నారు. హైదరాబాద్‌లో అల్లు అర్జున్‌ను అరెస్ట్ చేసినట్టుగానే.. బెంగళూరు ఘటనలో కోహ్లీని కూడా అరెస్ట్ చేయాలని డిమాండ్ చేస్తున్నారు.

ఇంకొందరేమో ఈ ఘటనను కర్ణాటక, తెలంగాణ రాజకీయాలతో కలిపి చర్చిస్తున్నారు. ఈ రెండు రాష్ట్రాల్లో కాంగ్రెస్ పార్టీనే అధికారంలో ఉంది కాబట్టి.. ఈ రెండు ఘటనల పట్ల రెండు ప్రభుత్వాలు ఒకేలా స్పందించాలి అన్నట్లుగా మాట్లాడుతున్నారు. పరోక్షంగా ఇటు తెలంగాణలో, అటు కర్ణాటకలో కాంగ్రెస్ ప్రభుత్వాలను ఇరుకున పెట్టడం కోసం ఇలా మాట్లాడుతున్నారేమో అనే అనుమానాలు సైతం తలెత్తుతున్నాయి.

ఇక అల్లు అర్జున్, కోహ్లిని పోలుస్తూ.. సోషల్ మీడియాలో పోస్టు చేస్తున్న మీమ్స్‌కైతే కొదవేం లేదు.

అసలేం జరిగింది?

అల్లు అర్జున్ కేసులో.. ఒక్కసారిగా అభిమానులు ఎగబడటం వల్ల సంధ్య థియేటర్ తొక్కిసలాట ఘటన జరిగింది. ఈ ఈవెంట్‌లో బన్నీ పాల్గొన్నారు. అంతేకాదు సినిమా థియేటర్‌కు అల్లు అర్జున్ రావడానికి తాము పర్మిషన్ ఇవ్వలేదని చిక్కడపల్లి పోలీసులు చెప్పారు. కానీ ఆర్సీబీ ఘటనలో ఆటగాళ్లు స్టేడియానికి రాక ముందే తొక్కిసలాట చోటు చేసుకుంది. విరాట్ కోహ్లీ బెంగళూరు జట్టులో సీనియర్ ఆటగాడు మాత్రమే. ఈవెంట్ నిర్వహణలో అతడికి ఎలాంటి కంట్రోల్ లేదు. పెద్ద సంఖ్యలో అభిమానులు స్టేడియానికి తరలివచ్చారు. కానీ వారిని కంట్రోల్ చేయడానికి పోలీసులు, అధికారులు తగిన ఏర్పాట్లు చేయలేదు.

కాబట్టి అల్లు అర్జున్‌ను అరెస్ట్ చేసినప్పుడు కోహ్లిని కూడా అరెస్ట్ చేయాలనే డిమాండ్.. న్యాయం కోసం కాకుండా సోషల్ మీడియాలో ట్రెండ్‌గా మారింది. అల్లు అర్జున్‌ తప్పేం లేకపోయినా, ఆయన్ను అన్యాయంగా అరెస్ట్ చేశారనే భావనను కూడా ఇందులో ధ్వనిస్తోంది.

అయితే అల్లు అర్జున్‌ను అరెస్ట్ చేశారు కదా అని విరాట్ కోహ్లిని అరెస్ట్ చేయాలనే డిమాండ్‌ సరైంది కాదని చాలా మంది అభిప్రాయపడుతున్నారు. అదే సమయంలో సెలబ్రిటీలకు రూల్స్ నుంచి మినహాయింపు ఉంటుందేమో అనే అనుమానం సైతం వ్యక్తమవుతోంది. చివరగా చెప్పాలంటే.. ఓ ఘటన జరిగినప్పుడు దానికి కారణమైన వ్యక్తి స్థాయిని చూడకుండా.. వాస్తవాల ఆధారంగా చర్యలు తీసుకోవడమే నిజమైన న్యాయం. కానీ కోహ్లిని అరెస్ట్ చేయాలనే డిమాండ్‌లో వాస్తవాలంటే కంటే భావోద్వేగాలే ఎక్కువగా కనిపిస్తున్నాయి.

2025-06-06T14:44:31Z