T20 WC FINAL: కోహ్లి కొట్టిన ఫోర్ వల్లే.. మిల్లర్ క్యాచ్‌ను సూర్య పట్టగలిగాడా?

టీ20 వరల్డ్ కప్ ఫైనల్ ముగిసి పది రోజులు దాటినప్పటికీ.. ఇప్పటికీ ఆఖరి ఓవర్లో సూర్య పట్టిన స్టన్నింగ్ క్యాచ్‌ను అభిమానులు మర్చిపోలేకపోతున్నారు. ఈ క్యాచ్ గురించి ఇప్పటికీ ఏదో ఒక రకంగా డిస్కషన్ నడుస్తూనే ఉంది. సూర్య కళ్లు చెదిరే రీతిలో క్యాచ్‌ను అందుకోగా.. ఆ క్యాచ్ కారణంగానే భారత్ వరల్డ్ కప్ గెలవగలిగింది. సూర్య అందుకుంది క్యాచ్ కాదు టీ20 ప్రపంచ కప్ ట్రోఫీనంటూ భారత అభిమానులు ప్రశంసలు గుప్పించారు.

అయితే సూర్య ఈ క్యాచ్‌ను పట్టాక.. థర్డ్ అంపైర్ ఓసారి చెక్ చేసి వెంటనే ఔటిచ్చాడని.. బంతిని అందుకునే క్రమంలో భారత ఫీల్డర్ బౌండరీ లైన్‌ను తాకాడని.. మరోసారి రిప్లేలో చూస్తే బాగుండేదని.. మిల్లర్ కొట్టిన షాట్ సిక్స్ అయ్యేదని సౌతాఫ్రికా ఫ్యాన్స్ కొందరు అభిప్రాయపడ్డారు. ఈ ఆరోపణలకు కౌంటర్ ఇచ్చేలా భారత అభిమానులు సూర్య పట్టిన క్యాచ్‌‌కు సంబంధించిన బెస్ట్ యాంగిల్ క్లిప్‌ను.. మైదానంలో నుంచి ఓ అభిమాని ఫోన్లో రికార్డ్ చేసిన వీడియోను షేర్ చేశారు. దీంతో సూర్య పట్టింది క్లీన్ క్యాచ్ అని తేలిపోయింది.

ఇప్పుడు సూర్య పట్టిన క్యాచ్‌కు సంబంధించి కోహ్లి ఫ్యాన్స్ మరో కొత్త వాదనను తెర మీదకు తెచ్చారు. జాన్సెన్ వేసిన ఇన్నింగ్స్ ఫస్ట్ ఓవర్లో విరాట్ కొట్టిన బౌండరీ వల్లే సూర్య పట్టింది క్యాచ్ అయ్యిందంటున్నారు. ఇంతకూ విషయం ఏంటంటే.. సూర్య క్యాచ్‌ను అందుకునే సమయంలో బౌండరీ లైన్ కొంచెం వెనక్కి జరిగినట్లు కనిపించిన సంగతి తెలిసిందే. కోహ్లి మిడాఫ్ దిశగా ఆడిన షాట్‌ బౌండరీ లైన్‌ను తాకింది. అయితే బంతిని ఆపే క్రమంలో సౌతాఫ్రికా ఫీల్డర్ డైవ్ చేయడంతో బౌండరీ రోప్ వెనక్కి వెళ్లింది. ఈ వీడియోను షేర్ చేసిన కొందరు.. కోహ్లి ఆడిన షాట్ వల్లే బౌండరీ లైన్ వెనక్కి వెళ్లిందని.. దాని వల్లే మిల్లర్ క్యాచ్‌ను సూర్య పట్టగలిగాడని అర్థం వచ్చేలా ట్వీట్లు చేస్తున్నారు.

దీనికి నెటిజన్లు తమదైన శైలిలో ఫ్యాక్ట్ చెక్ చేసి బదులిస్తున్నారు. ‘‘కోహ్లి ఆడిన షాట్ ‘క్రికెట్ 4 గుడ్’ అనే మ్యాట్ మీదుగా వెళ్లింది. మిల్లర్ బ్యాటింగ్ చేస్తున్నప్పుడు ఇది అతడి వెనుక వైపు ఉంది. విరాట్ ఆడిన షాట్ మిల్లర్ వెనుక వైపు వెళ్లింది’’ అని ఓ నెటిజన్ తన అబ్జర్వేషన్‌ను పోస్ట్ చేశాడు.

ఇంకొందరు నెటిజన్లు ఓ అడుగు ముందుకేసి.. టీ20 వరల్డ్ కప్ గెలిచిన క్రెడిట్‌ను కోహ్లి ఖాతాలో వేసేందుకు ప్రయత్నిస్తున్నారు.. గతంలో ధోనీ ఫ్యాన్స్ కూడా ఇలాగే చేసేవారంటూ ఈ మ్యాటర్‌లోకి ధోనీని లాగుతున్నారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-07-08T11:15:13Z dg43tfdfdgfd