INDIA HEAD COACH: టీమిండియా కొత్త కోచ్‌గా గౌతం గంభీర్.. జైషా అధికారిక ప్రకటన

టీమిండియాకు కొత్త కోచ్ వచ్చేశాడు. అందరూ ఊహించినట్టే గౌతమ్ గంభీర్‌ను భారత క్రికెట్ జట్టు హెడ్ కోచ్‌గా నియమిస్తూ బీసీసీఐ నిర్ణయం తీసుకుంది. బీసీసీఐ కార్యదర్శి జైషా ఈ విషయాన్ని మంగళవారం (జూలై 9) సాయంత్రం ఎక్స్ ద్వారా ప్రకటించారు. ‘భారత క్రికెట్ జట్టు కొత్త ప్రధాన కోచ్‌గా గౌతం గంభీర్‌ని స్వాగతిస్తున్నందుకు చాలా ఆనందంగా ఉంది. మాడర్న్ క్రికెట్ వేగంగా అభివృద్ధి చెందింది. గౌతమ్ ఈ మార్పును అతి దగ్గరగా గమనించాడు. తన కెరీర్‌లో వివిధ పాత్రల్లో రాణించి, కష్టాలను తట్టుకుని రాణించిన గౌతం గంభీర్ భారత క్రికెట్‌ను ముందుకు నడిపించే పాత్రకు తగిన వ్యక్తి అని నాకు నమ్మకం ఉంది’ అని జై షా పోస్టు చేశారు.

గంభీర్ చేపట్టబోయే ఈ కొత్త బాధ్యతల నిర్వహణలో బీసీసీఐ సంపూర్ణంగా ఆయనకు సహకరిస్తుందని జైషా పేర్కొన్నారు. ‘టీమ్ ఇండియా పట్ల ఆయనకు స్పష్టమైన దృష్టి ఉంది. దీనికి తోడు విస్తారమైన అనుభవం ఉంది. అంతేకాకుండా హెడ్ కోచ్ బాధ్యతలు చేపట్టేందుకు గంభీర్ చాలా ఉత్సాహంగా ఉన్నారు. ఆయన ఈ పాత్రను సమర్థంగా నిర్వహిస్తారనే నమ్మకం ఉంది’ అని జైషా రాసుకొచ్చారు.

టీమ్ఇండియా కోచ్‌గా రాహుల్ ద్రవిడ్ పదవీకాలం 2024 టీ20 ప్రపంచకప్‌తో ముగిసింది. జూలై నెలాఖరులో శ్రీలంకతో ప్రారంభమయ్యే టీ20, వన్డేల సిరీస్‌లకు కొత్త కోచ్‌ అందుబాటులో ఉంటాడని బీసీసీఐ కార్యదర్శి జై షా ఇప్పటికే ప్రకటించారు. ఇంటర్వ్యూ కొన్ని రోజుల కిందటే పూర్తయ్యింది. గంభీర్ ఎంపిక కూడా ఖాయమైనట్లు వార్తలు వచ్చాయి. అయితే, జీతభత్యాల విషయంలో చర్చల వద్దే జాప్యం జరిగినట్లు తెలుస్తోంది. జీతభత్యాల విషయంలో బీసీసీఐ, గంభీర్‌ మధ్య నేడు ఉదయం కూడా చర్చలు జరిగినట్లు సమాచారం. అవి కొలిక్కి రావడంతో అధికారిక ప్రకటన చేశారు.

టీమిండియా మాజీ బ్యాట్స్‌మన్‌గా, ఓపెనర్‌గా గంభీర్‌కు విశేషమైన అనుభవం ఉంది. అంతేకాకుండా 2011 వన్డే ప్రపంచకప్ విన్నింగ్ జట్టులో సభ్యుడు కూడా. ఫైనల్ మ్యాచ్‌లో 97 పరుగులు చేసి జట్టు విజయంలో కీలక పాత్ర పోషించాడు. ఐపీఎల్‌లో కోల్‌కతా నైట్ రైడర్స్ జట్టుకు మెంటార్‌గా వ్యవహరించాడు. అంతేకాదు, మెంటార్‌గా 2024 ఐపీఎల్ ట్రోఫీని కేకేఆర్ సాధించడంలో కీలక పాత్ర పోషించాడు. ఈ అనుభవమంతా టీమిండియాకు ఉపయోగపడుతుందని బీసీసీఐతో పాటు క్రికెట్ అభిమానులు భావిస్తున్నారు. కొత్త కోచ్, సెలెక్టర్ నియామకాలు జట్టులో కొత్త ఉత్సాహాన్ని ఇస్తాయని, రానున్న రోజుల్లో భారత క్రికెట్‌లో గణనీయమైన మార్పులు వస్తాయని ఆశిస్తున్నారు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-07-09T15:04:49Z dg43tfdfdgfd