IND VS AUS | సిరీస్‌పై టీమ్‌ఇండియా నజర్‌.. నేడు భారత్‌, ఆస్ట్రేలియా రెండో వన్డే

IND vs AUS | రసవత్తరంగా సాగిన తొలి పోరులో పైచేయి సాధించిన టీమ్‌ఇండియా.. విశాఖపట్నం వేదికగా రెండో వన్డేకు సిద్ధమైంది. బౌలర్ల ప్రతాపానికి మిడిలార్డర్‌ సహకారం తోడవడంతో వాంఖడే మ్యాచ్‌లో సునాయాసంగా గెలుపొందిన భారత్‌.. అదే జోరులో సిరీస్‌ పట్టేయాలని భావిస్తుంటే.. సమం చేసేందుకు కంగారూలు కసరత్తులు చేస్తున్నారు. రెగ్యులర్‌ కెప్టెన్‌ రోహిత్‌ రాకతో భారత బ్యాటింగ్‌ ఆర్డర్‌కు మరింత బలం చేకూరినైట్లెంది.

విశాఖపట్నం: సమిష్టి ప్రదర్శనతో ‘బోర్డర్‌-గవాస్కర్‌’ సిరీస్‌ చేజిక్కించుకున్న టీమ్‌ఇండియా.. ఇప్పుడు వన్డే సిరీస్‌ను కూడా ఒడిసి పట్టేందుకు రెడీ అయింది. మూడు మ్యాచ్‌ల సిరీస్‌లో భాగంగా తొలి వన్డేలో నెగ్గి ఫుల్‌ జోష్‌లో ఉన్న భారత్‌.. ఆదివారం వైజాగ్‌లో ఆస్ట్రేలియాతో రెండో మ్యాచ్‌ ఆడనుంది. వ్యక్తిగత కారణాల వల్ల తొలి మ్యాచ్‌కు దూరమైన రెగ్యులర్‌ కెప్టెన్‌ రోహిత్‌ శర్మ తిరిగి బరిలో దిగనున్నాడు. ఈ ఏడాది ఆఖర్లో భారత్‌ వేదికగా వన్డే ప్రపంచకప్‌ జరుగనున్న నేపథ్యంలో ఈ సిరీస్‌ను రిహార్సల్‌గా భావిస్తున్న ఆస్ట్రేలియా.. వాంఖడే మ్యాచ్‌లో మంచి ప్రదర్శనే చేసినా.. కీలక సమయాల్లో పట్టు చేజార్చి పరాజయం వైపు నిలిచింది. గత మ్యాచ్‌లో స్వల్ప లక్ష్యఛేదనలో టాపార్డర్‌ విఫలమైనా.. హార్దిక్‌, జడేజాతో కలిసి రాహుల్‌ మ్యాచ్‌ను ముగించాడు. సుదీర్ఘ ఫార్మాట్‌లో పెద్దగా ఆకట్టుకోలేక జట్టులో చోటు కోల్పోయిన రాహుల్‌.. తనపై వస్తున్న విమర్శలకు బ్యాట్‌తోనే సమాధానమిచ్చాడు. రోహిత్‌ రాకతో ఇషాన్‌కు ఉద్వాసన తప్పకపోవచ్చు. గిల్‌తో కలిసి రోహిత్‌ ఓపెనింగ్‌ చేయనుండగా.. విరాట్‌ మూడో స్థానంలో బ్యాటింగ్‌కు రానున్నాడు. గత మ్యాచ్‌లో పెద్దగా ఆకట్టుకోలేకపోయిన కోహ్లీ.. తెలుగు ప్రేక్షకుల సమక్షంలో భారీ ఇన్నింగ్స్‌ ఆడుతాడా చూడాలి. తనకు అచ్చొచ్చిన మైదానంలో కోహ్లీ శతక్కొట్టాలని అభిమానులు ఆకాంక్షిస్తున్నారు. తొలి వన్డేలో గోల్డెన్‌ డక్‌గా వెనుదిరిగిన సూర్యకుమార్‌ యాదవ్‌పై భారీ అంచనాలు ఉన్నాయి. ఇక రాహుల్‌, పాండ్యా, జడేజాతో మిడిలార్డర్‌ బలంగా కనిపిస్తున్నది. సిరాజ్‌, శార్దూల్‌తో కలిసి షమీ పేస్‌ భారాన్ని మోయనుండగా.. స్పెషలిస్ట్‌ స్పిన్నర్‌గా కుల్దీప్‌కు చోటు ఖాయమే. మరోవైపు గాయం నుంచి పూర్తిగా కోలుకోని వార్నర్‌.. ఈ మ్యాచ్‌లో బరిలోకి దిగుతాడా చూడాలి. గత వన్డేలో మెరుపు ఇన్నింగ్స్‌ ఆడిన మార్ష్‌తో పాటు స్మిత్‌, లబుషేన్‌, హెడ్‌, గ్రీన్‌, మ్యాక్స్‌వెల్‌, స్టొయినిస్‌ కలిసికట్టుగా రాణిస్తే.. ఆసీస్‌ను ఆపడం కష్టమే.

7 వైజాగ్‌ వేదికగా టీమ్‌ఇండియా ఇప్పటి వరకు తొమ్మిది వన్డేలు ఆడగా.. అందులో ఏడింట విజయం సాధించింది. ఒక మ్యాచ్‌లో ఓడగా.. ఒకటి ‘టై’గా ముగిసింది.

పిచ్‌, వాతావరణం

విశాఖపట్నం పిచ్‌ బ్యాటింగ్‌కు స్వర్గధామం. చివరిసారిగా ఇక్కడ జరిగిన వన్డేలో భారత్‌ 387 పరుగులు చేసింది. రోహిత్‌, రాహుల్‌ సెంచరీలు బాదారు. మ్యాచ్‌కు వర్షం అంతరాయం కలిగించే అవకాశం ఉంది.

తుది జట్లు (అంచనా)

భారత్‌: రోహిత్‌ (కెప్టెన్‌), గిల్‌, కోహ్లీ, సూర్యకుమార్‌, రాహుల్‌, పాండ్యా, జడేజా, శార్దూల్‌, కుల్దీప్‌, షమీ, సిరాజ్‌.

ఆస్ట్రేలియా: స్మిత్‌ (కెప్టెన్‌), మార్ష్‌, హెడ్‌, లబుషేన్‌, కారీ, గ్రీన్‌, మ్యాక్స్‌వెల్‌, స్టొయినిస్‌, అబాట్‌, స్టార్క్‌, జంపా.

118, 117, 99, 65, 157*, 0..

వైజాగ్‌లో కోహ్లీ ఆడిన ఆరు వన్డేల్లో చేసిన పరుగులివి. ఈ గణాంకాలు చాలు విరాట్‌కు వైజాగ్‌

అచ్చొచ్చిన స్టేడియం అని చెప్పేందుకు!

2023-03-18T20:36:41Z dg43tfdfdgfd