మియాన్ సిరాజ్‌కు గ్రాండ్‌ వెల్‌కమ్‌.. అంబరాన్ని తాకిన సంబురాలు..!

టీ20 ప్రపంచకప్‌ 2024 టైటిల్‌ సాధించిన భారత జట్టులో సభ్యుడిగా ఉన్న హైదరాబాదీ పేసర్‌ మహమ్మద్‌ సిరాజ్‌కు ఘన స్వాగతం లభించింది. ముంబైలో విజయోత్సవ ర్యాలీని ముగించిన శుక్రవారం హైదరాబాద్‌ గడ్డపై అడుగుపెట్టిన సిరాజ్‌కు.. స్వాగతం పలికేందుకు పెద్ద సంఖ్యలో అభిమానులు ఎయిర్‌పోర్ట్‌కు చేరుకున్నారు. దీంతో యిర్‌పోర్ట్‌ అధికారులు, సైబరాబాద్‌ పోలీసులు బందోబస్తును ఏర్పాటు చేశారు. అభిమానులు ఎయిర్‌ పోర్ట్‌ నుంచి తన నివాసం వరకు భారీ ర్యాలీ నిర్వహించారు. రోడ్డు పక్కన భారీ కటౌట్‌లు ఏర్పాటు చేసి తమ అభిమానాన్ని చాటుకున్నారు.

హైదరాబాద్ ఎయిర్‌ పోర్ట్‌లో అడుగుపెట్టిన అనంతరం సిరాజ్‌ మాట్లాడాడు. టీ20 ఫార్మాట్‌లో ప్రపంచకప్‌ను అందుకున్న రోజును జీవితంలో మరిచిపోలేనని చెప్పుకొచ్చాడు. భారత్‌కు మరిన్ని ప్రపంచకప్‌లో తీసుకురావడమే తన లక్ష్యమని ఈ హైదరాబాదీ పేసర్‌ వ్యాఖ్యానించాడు. ఇక మెహిదీపట్నంలోని సరోజిని దేవి కంటి ఆస్పత్రి వద్ద శుక్రవారం రాత్రి 7 గంటల తర్వాత విజయోత్సవ ర్యాలీ ప్రారంభమైంది. కారు ఓపెన్‌ టాప్‌ నుంచి సిరాజ్‌ ఫ్యాన్స్‌కు అభివాదం చేస్తూ కనిపించాడు.

‘ఇండియా, ఇండియా’ ‘వీ లవ్‌ యూ సిరాజ్‌ భాయ్‌’ అంటూ ఫ్యాన్స్ కేరింతలు కొట్టారు. మియాన్‌ భాయ్‌ డీజే పాటకు స్టెప్పులేశారు. ఈ విజయోత్సవ ర్యాలీ మెహిదీపట్నం, మాసబ్‌ట్యాంక్, ఖాజామేన్షన్, పోలీసాఫీసర్స్‌మెస్, నషేమన్‌ హోటల్‌ మీదుగా ఫస్ట్‌లాన్సర్‌లోని ఈద్గా మైదానం వరకు కొనసాగింది.

కాగా టీ20 ప్రపంచకప్‌ 2024 టైటిల్‌ గెలిచిన భారత్.. గురువారం ఉదయం భారత గడ్డపై అడుగుపెట్టిన విషయం తెలిసిందే. గురువారం మొత్తం దేశవ్యాప్తంగా సంబురాలు జరిగాయి. తొలుత ఢిల్లీ ఎయిర్‌పోర్ట్‌లో ప్రత్యేక విమానంలో ల్యాండ్‌ అయిన టీమిండియా అక్కడి నుంచి హోటల్‌కు చేరుకుంది. ఆ తర్వాత రోహిత్ శర్మ నేతృత్వంలోని భారత జట్టు ప్రధానమంత్రి నరేంద్ర మోదీతో భేటీ అయింది. అక్కడి నుంచి ప్రత్యేక విమానంలో ముంబై చేరుకుంది. ముంబైలోని మెరైన్‌ డ్రైవ్‌ నుంచి వాంఖడే వరకు భారీ విజయోత్సవ ర్యాలీ చేపట్టారు. ఓపెన్‌ టాప్‌ బస్సులో ఫ్యాన్స్‌కు అభివాదం చేస్తూ ముందుకెళ్లారు. చివరగా వాంఖడే స్టేడియంలో జరిగిన వేడుకలతో సంబురాలు ఘనంగా ముగిశాయి.

ముంబైలో వేడుకలు పూర్తయిని వెంటనే మహమ్మద్‌ సిరాజ్‌ ఇన్‌స్టాగ్రామ్‌లో స్టోరీ పెట్టాడు. శుక్రవారం సాయంత్రం హైదరాబాద్‌లో వేడకలు జరుపుకుందామని చెప్పుకొచ్చాడు. ఇచ్చిన మాట ప్రకారం శుక్రవారం రాత్రి హైదరాబాద్‌లో విజయోత్సవ ర్యాలీ నిర్వహించాడు.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-07-06T04:51:10Z dg43tfdfdgfd