నేడు జింబాబ్వేతో మ్యాచ్.. జైశ్వాల్ VS అభిషేక్.. ఓపెనర్ ఎవరు?

జింబాబ్వే పర్యటనలో ఆడిన తొలి టీ20 మ్యాచులో అనూహ్యంగా తడబడి ఓటమిపాలైన భారత్.. రెండో మ్యాచులో బలంగా పుంజుకుంది. పరుగుల వరద పారించి.. 100 పరుగుల తేడాతో విక్టరీ నమోదు చేసింది. ఛాంపియన్ ఆటతీరుతో పసికూన జింబాబ్వేను మట్టికరిపించింది. ఈ నేపథ్యంలో 2 రోజుల విరామ తర్వాత మూడో టీ20 మ్యాచుకు సిద్ధమైంది. నేడు హరారే వేదికగా సాయంత్రం 4.30 గంటలకు మ్యాచ్ ప్రారంభం కానుంది. తొలి రెండు మ్యాచులకు దూరమైన యశస్వి జైశ్వాల్, సంజూ శాంసన్, శివమ్ దూబెలు జట్టులోకి రావడంతో టీమిండియా మరింత బలంగా తయారైంది. అయితే వీరి కోసం ఎవర్ని పక్కనపెడతారు? అనేది ఆసక్తికరంగా మారింది.

యశస్వీ జైశ్వాల్ vs అభిషేక్ శర్మ.. ఓపెనర్ ఎవరు?

తన అంతర్జాతీయ కెరీర్‌లో ఆడిన రెండో మ్యాచులోనే సెంచరీ కొట్టిన యువ ప్లేయర్ అభిషేక్ శర్మ సత్తాచాటాడు. అయితే ప్రస్తుతం జట్టులోకి యశస్వి జైశ్వాల్ చేరడంతో అభిషేక్ తుది జట్టులో ఉంటాడా? లేదా? అన్నది ఆసక్తికరంగా మారింది. ఓపెనర్‌గా గిల్ రావడం దాదాపు ఖాయం. మరో ప్లేసు కోసం అభిషేక్, జైశ్వాల్ మధ్య పోటీ నెలకొంది. కానీ ఓపెనర్‌గా జైశ్వాల్‌కు మంచి రికార్డు ఉంది. ఈ నేపథ్యంలో యాజమాన్యం అతడివైపే మొగ్గు చూపే అవకాశం ఉంది. దీంతో అభిషేక్ శర్మ మూడో ప్లేసులో ఆడే అవకాశం ఉంది. రుతురాజ్ నాలుగో స్థానంలో బ్యాటింగ్‌కు వస్తాడు. ధ్రువ్ జురెల్ స్థానంలో సంజూ శాంసన్ ఎంట్రీ ఇస్తాడు. రియాన్ పరాగ్ ప్లేసులో శివమ్ దూబే జట్టులోకి వచ్చే అవకాశం ఉంది. బౌలింగ్ విషయానికి వస్తే ముకేశ్ కుమార్, ఆవేశ్ ఖాన్, రవి బిష్ణోయ్, వాషింగ్టన్ సుందర్‌లు సత్తాచాటేందుకు సిద్ధంగా ఉన్నారు.

మొత్తంగా రెండో మ్యాచుతో పోలిస్తే.. ఇవాళ జరిగే మూడో టీ20 మ్యాచుకు టీమిండియా తుది జట్టులో మూడు మార్పులు చోటు చేసుకునే అవకాశం ఉంది. రెండో టీ20లో ఘోరంగా విఫలమైన ఆతిథ్య జింబాబ్వే ఈ మ్యాచులో పుంజుకోవాలని భావిస్తోది. కెప్టెన్ సికంద్ రజాతో పాటు.. బెనట్, జాంగ్వి, ముజరబానీ, చటారలపై ఆ జట్టు ఆశలు పెట్టుకుంది. తొలి రెండు టీ20 మ్యాచులు జరిగిన హరారే వేదికగానే మూడో మ్యాచ్ కూడా జరగనుంది. ఈ మ్యాచ్ ఇవాళ సాయంత్రం 4.30 గంటలకు ప్రారంభం కానుంది.

భారత తుది జట్టు అంచనా:

శుభ్‌మన్ గిల్, యశస్వి జైశ్వాల్, అభిషేక్ శర్మ, రుతురాజ్ గైక్వాడ్, సంజూ శాంసన్, శివమ్ దూబె, రింకూ సింగ్, వాషింగ్టన్ సుందర్, రవి బిష్ణోయ్, ఆవేశ్ ఖాన్, ముకేశ్ కుమార్

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-07-10T04:06:56Z