ద్రవిడ్‌ను ఉద్దేశిస్తూ రోహిత్ శర్మ భావోద్వేగ సందేశం.. మాటలు రావడంలేంటూ..!

టీమిండియా హెడ్ కోచ్ బాధ్యతల నుంచి రాహుల్ ద్రవిడ్ వైదొలిగిన విషయం తెలిసిందే. వన్డే ప్రపంచకప్ 2023తోనే ద్రవిడ్ పదవీకాలం ముగిసినా.. టీ20 ప్రపంచకప్ 2024 వరకు అతడిని కొనసాగించింది బీసీసీఐ. బీసీసీఐ పెట్టుకున్న నమ్మకాన్ని నిలబెడుతూ.. టీ20 ప్రపంచకప్ 2024 టైటిల్‌ను అందించాడు. ప్లేయర్‌గా సాధించలేకపోయిన దానిని కోచ్‌గా కైవసం చేసుకున్నాడు. ఘనంగా వీడ్కోలు పలికాడు. ఈ టోర్నీ ద్వారా రోహిత్ శర్మ కూడా తన సారథ్యంలో తొలి ప్రపంచకప్‌ను అందుకున్నాడు. ప్రపంచకప్ తర్వాత రోహిత్ శర్మ కూడా అంతర్జాతీయ టీ20లకు గుడ్‌బై చెప్పాడు. ఈ నేపథ్యంలో టీమిండియా కెప్టెన్ రోహిత్ శర్మ.. రాహుల్ ద్రవిడ్‌ను ఉద్దేశిస్తూ భావోద్వేగ సందేశం రాశాడు. ఈ మేరకు తన ఇన్‌స్టాగ్రామ్ ఖాతాలో ఈ సందేశాన్ని పంచుకున్నాడు.

"ప్రియమైన రాహుల్ భాయ్.. నేను చెప్పానకున్న విషయాలు నా మనసులోనే భావాలను తెలియజేసేందుకు సరైన పదాల కోసం వెతుకుతున్నా. పదాలు మారినా.. నేను చెప్పాలనుకున్న విషయాన్ని మాత్రం చెప్పి తీరతా. కోట్లాది మంది భారత అభిమానుల లాగే.. నేను కూడా చిన్నప్పటి నుంచి మిమ్మల్ని చూస్తూ పెరిగా. కానీ వారెవరికీ రాని అద్భుత అవకాశం నాకు దక్కింది. క్రికెట్‌లో మీరు దిగ్గజం. మీ పేరు ప్రఖ్యాతలు, మీరు సాధించిన ఘనతల్ని వదిలేసి.. కోచ్‌గా టీమిండియా డ్రెస్సింగ్‌ రూమ్‌లోకి అడుగుపెట్టారు. మీతో ఏ విషయమైనా.. చెప్పేంత ఫ్రీడమ్ ఇచ్చారు. ఇన్నేళ్లయినా.. ఆట పట్ల మీకుప్రేమ తగ్గలేదు. మీ నుంచి చాలా నేర్చుకున్నా.మీతో పనిచేసిన క్షణాలు చిరస్మరణీయం. మీతో కలిసి ప్రపంచకప్ టైటిల్ సాధించినందుకు సంతోషంగా ఉంది"

"మీరు నా వృత్తిపరమైన భార్య అని నా భార్య రితిక అంటూ ఉంటుంది. పనిలో ఉన్నప్పుడు రితికను పట్టించుకోకుండా మీతో (ద్రవిడ్) ఉంటానని ఆమె అలా అంటుంది. అలా పిలిపించుకోవడం కూడా నా అదృష్టంగానే భావిస్తా. నేను మిమ్మల్ని మిస్ అవుతా. అయితే మనం కలిసి సాధించిన విజయం పట్ల సంతోషంగా ఉన్నా. రాహుల్ భాయ్.. నా కోచ్, నా ఫ్రెండ్ అని అనుకుంటూ ఉంటే ఎంతో సంతోషంగా ఉంటుంది" అని రోహిత్ శర్మ తన సందేశంలో పేర్కొన్నాడు.

కాగా 2022 టీ20 ప్రపంచకప్‌ నుంచి టీమిండియా హెడ్ కోచ్‌గా జర్న ప్రారంభించాడు రాహుల్ ద్రవిడ్. అయితే ఆ టోర్నీలో సెమీఫైనల్‌లో భారత్ ఓడిపోయింది. ఆ తర్వాత ప్రపంచటెస్టు ఛాంపియన్ షిప్ 2023 ఫైనల్, వన్డే ప్రపంచకప్ 2023లో ఫైనల్‌లో ఓడిపోయింది. ద్రవిడ్ కోచ్‌గా తన చివరి ఐసీసీ టోర్నీ టీ20 ప్రపంచకప్ 2024లో మాత్రం విజయం సాధించింది.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-07-10T05:07:06Z dg43tfdfdgfd