దటీజ్ పాండ్యా.. ఐపీఎల్‌లో ఛీత్కారాలు వచ్చిన చోటే సత్కారాలు..

17 ఏళ్ల విరామం తర్వాత టీమిండియా టీ20 ప్రపంచకప్ సాధించిన విషయం తెలిసిందే. ఈ నేపథ్యంలో భారత గడ్డపై అడుగుపెట్టిన టీమిండియాకు అపూర్వ స్వాగతం లభించిన విషయం తెలిసిందే. అయితే ముంబైలో విజయోత్సవ ర్యాలు, వాంఖడేలో వేడుకల సందర్భంగా ఓ ఆసక్తికర ఘటన జరిగింది. టీ20 ప్రపంచకప్ 2024లో భారత టైటిల్ సాధించడంలో కీలకపాత్ర పోషించిన ఆల్ రౌండర్ హార్దిక్ పాండ్యాకు జనం నీరాజనాలు పలికారు. రెండు నెలల క్రితం ఇదే ముంబైలో ఛీత్కారాలకు గురైన హార్దిక్.. ఇప్పుడు మాత్రం జేజేలు అందుకున్నాడు. హార్దిక్ హార్దిక్ నామస్మరణతో వాంఖడే స్టేడియం మార్మోగిపోయింది.. దీన్ని బట్టే అర్థం చేసుకోవచ్చు పాండ్యా క్రేజ్ ఎలాంటింది.

ఐపీఎల్ 2024కు ముందు ముంబై ఇండియన్స్ కెప్టెన్‌గా హార్దిక్ పాండ్యా బాధ్యతలు చేపట్టిన విషయం తెలిసిందే. ఐపీఎల్‌లో ముంబైని ఐదుసార్లు ఛాంపియన్‌గా నిలిపిన రోహిత్ శర్మను తప్పించారు. దీంతో అతడి అభిమానులు ఆగ్రహానికి గురయ్యారు. దీంతో హార్దిక్ పాండ్యా హేళనకు గురయ్యాడు. ఐపీఎల్ 2024 మొత్తం ఇదే జరిగింది. ఓ దశలో పాండ్యా ఒంటరివాడై పోయాడు. గుజరాత్ టైటాన్స్ కెప్టెన్‌గా ఉన్న సరిపోయేదేమో.. అనవసరంగా టీమ్ మారానా అని హార్దిక్ పాండ్యా అనుకునేంతలా పరిస్థితులు మారిపోయాయి. దీంతో హార్దిక్ పాండ్యా ఆటతీరు కూడా దారుణంగా దెబ్బతింది. ముంబై జట్టు కూడా ప్లే ఆఫ్స్ చేరకుండానే నిష్క్రమించడంతో పాండ్యాపై ట్రోల్స్ ఎక్కువయ్యాయి.

కానీ రెండు నెలల తర్వాత పరిస్థితులు తారుమారయ్యాయి. భారత జెర్సీ వేసుకోగానే హార్దిక్‌ ఆటతీరు పూర్తిగా మారిపోయింది. ఏదో తెలీని శక్తి అతడిలోకి ప్రవేశించినట్లుగా అతడు అసాధారణ ప్రదర్శన చేశాడు. ప్రపంచక్‌లో ఆల్ రౌండ్ షోతో అదరగొట్టాడు. బ్యాటింగ్ బౌలింగ్‌లో సత్తాచాటాడు. ముఖ్యంగా ఫైనల్‌లో చివరి ఓవర్‌లో 16 పరుగులను కాపాడి భారత్‌ను విజేతగా నిలిపాడు. ఆ ఓవర్‌లో ఆఖరి బంతి వేసిన అనంతరం పాండ్యా గ్రౌండ్‌లోనే ఏడ్చేశాడు. పాండ్యా కన్నీళ్లు పెట్టుకున్న దృశ్యాలు కోట్లాది మంది భారతీయులను కదిలించాయి.

ప్రపంచకప్ టైటిల్‌తో తొలిసారి భారత గడ్డపై అడుగుపెట్టిన టీమిండియాకు అపూర్వ స్వాగతం లభించింది. ఈ క్రమంలో విజయోత్సవ ర్యాలీ సందర్భంగా ముంబైకి వచ్చిన పాండ్యాకు అపూర్వ స్వాగతం లభించింది. మెరైన్ డ్రైవ్‌లో జరిగిన విజయోత్సవ ర్యాలీలో హార్దిక్ హార్దిక్ అంటూ ఫ్యాన్స్ నినాదాలు చేశారు. ఐపీఎల్ సందర్భంగా గేలి చేసినందుకు కొందరైతే హార్దిక్ పాండ్యాకు క్షమాపణలు చెప్పారు.

వాంఖడేలో జరిగిన కార్యక్రమంలో కూడా హార్దిక్ పాండ్యాకు నీరాజనం దక్కింది. హార్దిక్ పాండ్యా నామస్మరణతో స్టేడియం మార్మోగిపోయింది. తన స్పీచ్ సందర్భంగా కెప్టెన్ రోహిత్ శర్మ సైతం హార్దిక్ పాండ్యా అద్భుతమని కొనియాడాడు. అప్పుడు కూడా స్టేడియం హార్దిక్ హార్దిక్ అనే నినాదాలతో దద్దరిళ్లింది. దీంతో అతడు పైకి లేచి అందరికీ అభివాదం చేశాడు. ఇందుకు సంబంధించిన వీడియోలు సోషల్ మీడియాలో వైరల్‌గా మారాయి.

ఈ నేపథ్యంలో పలువురు నెటిజన్లు దటీజ్ పాండ్యా అంటూ కామెంట్లు చేస్తున్నారు. శెభాష్ పాండ్యా.. ఛీత్కారాలు అందుకున్న చోటే జేజేలు కొట్టించుకున్నావ్ హ్యాట్రాఫ్..

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-07-05T02:01:43Z dg43tfdfdgfd