దటీజ్ ద్రవిడ్.. ప్రైజ్‌మనీ సగమే చాలట.. ఎందుకో తెలుసా..!

టీ20 ప్రపంచకప్ 2024లో విజేతగా నిలిచిన భారత క్రికెట్ జట్టుకు హెడ్‌కోచ్‌గా ఉన్న రాహుల్ ద్రవిడ్‌కు కీలక నిర్ణయం తీసుకున్నట్లు తెలుస్తోంది. బీసీసీఐ ప్రకటించిన రివార్డు విషయంలో తనకు దక్కే మొత్తంలో కొంత మొత్తాన్ని తగ్గించుకోవాలని చూస్తున్నట్లు వార్తలు వస్తున్నాయి. కాగా టీ20 ప్రపంచకప్ 2024 ద్వారా భారత జట్టు 11 ఏళ్ల ఐసీసీ ట్రోఫీ నిరీక్షణకు తెరదించిన విషయం తెలిసిందే. గత కొన్నేళ్లుగా ఐసీసీ ట్రోఫీల్లో సెమీఫైనల్, ఫైనల్‌లో ఓటమిపాలైన టీమిండియా.. ఎట్టకేలకు టీ20 ప్రపంచకప్ 2024ను సాధించింది. ఈ విజయంలో రాహుల్ ద్రవిడ్ కీలకపాత్ర పోషించాడు.

టీ20 ప్రపంచకప్ 2024 టైటిల్ సాధించిన అనంతరం బీసీసీఐ.. రూ.125 కోట్లను భారత క్రికెట్ జట్టుకు నజరానాగా ప్రకటించింది. ప్రధాన జట్టులోని 15మందితో పాటు.. రిజర్వ్ ప్లేయర్లు, హెడ్ కోచ్, సపోర్టింగ్ స్టాఫ్‌కు ఇందులో వాటా దక్కింది. ప్రధాన జట్టులోని 15 మంది ఆటగాళ్లతో పాటు రాహుల్ ద్రవిడ్‌కు రూ.5 కోట్ల చొప్పున ఇచ్చింది బీసీసీఐ. బ్యాటింగ్ కోచ్ విక్రమ్ రాథోడ్, ఫీల్డింగ్ కోచ్ దిలీప్, బౌలింగ్ కోచ్ పరాస్ మాంబ్రేలకు రూ.2.5 కోట్లు ఇచ్చింది. అయితే ఆటగాళ్లతో సమానంగా తనకు రివార్డు ఇవ్వడం, ఇతర కోచింగ్ స్టాఫ్ కంటే తనకు రెట్టింపు నగదు ఇవ్వడంపై ద్రవిడ్ అభ్యంతరం తెలిపినట్లు వార్తలు వస్తున్నాయి.

"హెడ్ కోచ్ రాహుల్ ద్రవిడ్ తన సహాయ కోచింగ్ స్టాఫ్‌కు ఇచ్చినట్లుగానే తనకు కూడా రూ.2.5కోట్లు మాత్రమే ఇవ్వాలని కోరాడు. వాస్తవానికి ద్రవిడ్‌కు రూ.5 కోట్లు వచ్చాయి. దీంతో తనను ప్రత్యేకంగా చూడటంపై ఆయన అసౌకర్యంగా ఫీల్ అయ్యాడు. అతడి సెంటిమెంట్‌ను మేం అర్థం చేసుకున్నాం. అతడి నిర్ణయాన్ని గౌరవిస్తాం" అని బీసీసీఐ వర్గాలు తెలిపాయి. రాహుల్ ద్రవిడ్ నిర్ణయంతో ఆయనకు రూ.5 కోట్లు కాకుండా రూ.2.5 కోట్లు దక్కే అవకాశం ఉంది.

2018లోనూ ఇలాగే..

కాగా రివార్డులను సమానంగా పంచాలని ద్రవిడ్ కోరడం ఇదే మొదటిసారి కాదు. గతంలో కూడా రాహుల్ ద్రవిడ్ ఇదే వైఖరిని అవలంబించారు. 2018 అండర్-19 ప్రపంచకప్ గెలిచిన భారత జట్టుకు హెడ్‌కోచ్‌గా ఉన్న ద్రవిడ్.. తనకు ఎక్కువ బోనస్ ఇవ్వడాన్ని నిరాకరించాడు. వాస్తవానికి అప్పట్లో ద్రవిడ్‌కు రూ.50 లక్షలు, ఇతర సహాయక సిబ్బందికి రూ.20 లక్షలు, ఆటగాళ్లకు రూ.30 లక్షలు ఇవ్వాలని బీసీసీఐ తొలుత నిర్ణయించింది. కానీ ద్రవిడ్ విజ్ఞప్తి మేరకు అతడితో సహా కోచింగ్ సిబ్బందిలోన ప్రతీ ఒక్కరికీ రూ.25 లక్షల చొప్పున అందించేలా నిర్ణయం తీసుకుంది. కాగా రాహుల్ ద్రవిడ్ నిర్ణయంపై సర్వత్రా ప్రశంశలు దక్కుతున్నాయి.

ఇటువంటి మరిన్ని వార్తలు సమయం తెలుగులో చదవండి. లేటెస్ట్ వార్తలు, సిటీ వార్తలు, జాతీయ వార్తలు, బిజినెస్ వార్తలు, క్రీడా వార్తలు, రాశిఫలాలు ఇంకా లైఫ్‌స్టైల్ అప్‌డేట్లు మొదలగునవి తెలుసుకోండి. వీడియోలను TimesXP లో చూడండి.

2024-07-10T06:07:16Z dg43tfdfdgfd