ఇక వీడ్కోలు.. మీ ప్రేమ మరచిపోలేనిది.. భువనేశ్వర్ ఎమోషనల్ పోస్ట్‌..!

టీమిండియా వెటరన్ పేసర్ భువనేశ్వర్ కుమార్ 11 ఏళ్ల తర్వాత ఐపీఎల్‌లో ఫ్రాంఛైజీ మారాడు. ఇన్నాళ్లు సన్‌రైజర్స్ హైదరాబాద్ తరఫున ఆడిన ఈ ప్లేయర్.. వచ్చే సీజన్ నుంచి మాత్రం రాయల్‌ ఛాలెంజర్స్ బెంగళూరు జట్టు తరఫున ఆడనున్నాడు. ఇటీవల జరిగిన ఐపీఎల్ 2025 మెగా వేలానికి ముందు సన్‌ రైజర్స్ జట్టు భువీని రిటైన్ చేసుకోలేదు. అంతేకాకుండా వేలంలో కూడా కొనుగోలు చేయలేదు. ఈ వేలంలో రాయల్‌ ఛాలెంజర్స్ బెంగళూరు జట్టు రూ.10.75 కోట్లకు అతడిని దక్కించుకుంది. ఐపీఎల్ మెగా వేలంతో సన్‌రైజర్స్ హైదరాబాద్‌కు భువనేశ్వర్‌కుమార్‌కు మధ్య ఉన్న 11 ఏళ్ల బంధానికి ముగింపు కార్డు పడినట్లయింది. ఈ నేపథ్యంలో సన్‌రైజర్స్ హైదరాబాద్‌ జట్టులో తన ప్రయాణాన్ని ఉద్దేశించి భువనేశ్వర్‌ కుమార్ సోషల్ మీడియాలో భావోద్వేగ పోస్టు పెట్టాడు. పదకొండేళ్ల ప్రయాణం ముగిసిపోయిందని అందులే పేర్కొన్నాడు. ఆరెంజ్‌ ఆర్మీని ఉద్దేశించి సుదీర్ఘ పోస్టు పెట్టాడు. “సన్‌రైజర్స్ హైదరాబాద్‌తో అద్భుతమైన 11 ఏళ్ల ప్రయాణానికి వీడ్కోలు పలుకుతున్నా. నాకెన్నో మరుపురాని చిర్మసరణీయ జ్ఞాపకాలు ఇక్కడ ఉన్నాయి. ఈ అభిమానుల ప్రేమ మరచిపోలేనిది. మీ ప్రేమను మిస్‌ అవ్వను. మీరిచ్చిన సపోర్ట్‌ను ఎన్నటికీ మరువను. నా ప్రయాణాన్ని అద్భుతంగా మలిచినందుకు అందరికీ ధన్యవాదాలు. నాపై మీ ప్రేమ ఇలాగే కొనసాగాలి” అని భువనేశ్వర్‌ కుమార్ సోషల్ మీడియాలో పోస్టు పెట్టాడు. పోస్టుతో పాటు ఓ వీడియోను కూడా పంచుకున్నాడు.కాగా ఐపీఎల్‌ వేలం తర్వాత సన్‌రైజర్స్ హైదరాబాద్ జట్టు కూడా భువీని ఉద్దేశించి పోస్టు పెట్టింది. "అతడు వచ్చాడు, అతను మాతో పాటు ఎదిగాడు, అతడు తనదైన శైలిలో రాణించాడు. ఎప్పటికీ అతడు మన హృదయాలలో ఒక ప్రత్యేక స్థానాన్ని కలిగి ఉంటాడు. దశాబ్దానికి పైగా జట్టుతో కలిసి ప్రయాణించినందుకు థాంక్యూ కింగ్" అని సన్‌ రైజర్స్ హైదరాబాద్‌ పోస్టు పెట్టింది. దీంతో పాటు కంట్లో నీళ్లు తిరుగుతున్నట్లుగా ఉన్న ఎమోజీ, హార్ట్ సింబల్‌ను కూడా జతచేసింది.ఉత్తరప్రదేశ్‌కు చెందిన కుడిచేతి వాటం పేసర్‌ భువనేశ్వర్‌ కుమార్‌ను ఆర్సీబీ 2009లో జట్టులోకి తీసుకుంది. రెండేళ్లు జట్టుతోనే ఉన్నా.. తుది జట్టులో మాత్రం చోటు ఇవ్వలేదు. ఆ తర్వాత రైజింగ్ పుణె సూపర్ జెయింట్స్ తరఫున ఆడిన భువీ.. 2014లో సన్రైజర్స్ హైదరాబాద్ జట్టులో చేరాడు. 2016లో సన్‌రైజర్స్‌ టైటిల్‌ గెలవడంలో కీలకపాత్ర పోషించాడు. 11 ఏళ్ల తర్వాత సన్‌రైజర్స్‌ను వీడి తిరిగి 15 ఏళ్ల తర్వాత రాయల్ ఛాలెంజర్స్ బెంగళూరు జట్టుకు మారాడు. ఇండియన్ ప్రీమియర్ లీగ్‌లో 176 మ్యాచులు ఆడిన ఈ వెటరన్‌ పేసర్‌.. 181 వికెట్లు పడగొట్టాడు.

2024-11-28T09:48:31Z